Хоразм вилояти Шовот туманида 21 ёшли йигит бензин цистернасини тозалаш вақтида ёқилғи қолдиқлари ҳидидан заҳарланиб, ҳалок бўлди.

Уни қутқаришга уринган шахс ҳам ҳушидан кетди, аммо омон қолди.  

Маълумотларга кўра, тумандаги «Шохобод 2022» ёқилғи қуйиш шохобчаси ишчи-оператори И.К. (1999 йилда туғилган) аввал ҳам 4 марта бу ишни бажариб, хизмат ҳақи олган З.Р.дан цистерна ичини тозалашни сўраган.

З.Р. вақти йўқлигини билдириб, ўғли М.О.ни (2004 й.т.) юборган. Йигит цистернага нарвон билан тушиб, белкурак ёрдамида тозалашни бошлаган. Шу пайт цистерна ичидаги ёқилғи қолдиқлари ҳидидан заҳарланиб, ҳушидан кетган.

И.К. уни қутқаришга ҳаракат қилган, аммо ўзи ҳам ҳаво етишмовчилиги туфайли ҳушини йўқотган. Уни бошқа шахс цистернадан чиқаришга муваффақ бўлган, аммо 21 ёшли М.О. ичкарида қолиб кетган ва вафот этган.

Ҳодиса юзасидан терговга қадар текширув ишлари олиб борилмоқда.

А. Шокиров, ЎзА