Хитой жанубидаги Фошан шаҳрида минглаб одам “чикунгуня” номи билан тарқалган вирусга чалинди. Ҳукумат расмий маълумотига кўра, ҳозиргача 7 000 дан ортиқ ҳолат аниқланган. Вирус юқтирганлар сони аста-секин камаймоқда. Шунга қарамасдан, бу мамлакат тарихидаги энг йирик эпидемия бўлиши мумкинлиги таъкидланган.

– Чикунгуня – чивин орқали юқадиган касаллик бўлиб, иситма ва бўғим оғриғи билан кечади, – дейди Оксфорд университети олими Сесар Лопес-Камачо. – Бу вирус илгари Хитойда кенг тарқалмаган эди. Шу боис аксар аҳоли мазкур зараркунандага қарши иммунитетга эга эмас.

Расмийлар шаҳарлар ва бошқа аҳоли манзилларида инсектицид сепиш, тармоқли тўр ўрнатиш ва дрон ёрдамида зарарланган жойларни аниқлаш каби чора-тадбирларни кўрмоқда. Кўрсатмага амал қилмаган фуқаролар 1400 долларгача жарима ва электр таъминоти узилиши билан жазоланади.

Баъзи ҳудудларда чивин личинкасини ейдиган балиқ ва вирус ташувчи чивинни еб қўювчи йирик чивин ҳам ишга солиняпти.

АҚШ Гуангдонг провинцияси, хусусан Фошан шаҳрига бораётган фуқароларга эҳтиёт бўлишни тавсия қилмоқда. Вақтинча касаллар учун мажбурий бир ҳафталик шифохона даволаниши жорий қилинган. Бошда икки ҳафталик уй карантини белгиланган эди. Мазкур вирус одамдан одамга ўтмаслиги сабабли ҳозир бу чорадан воз кечилган.

Чикунгуня тарқалишига кучли ёмғир ёки юқори ҳарорат сабаб бўлади. Ҳукумат миллий даражада фавқулодда йиғилиш ўтказиб, эпидемияга қарши кураш бўйича махсус протокол қабул қилган.

Мусулмон Зиё, ЎзА