Тошкентдаги Халқаро шахмат академиясида ўн кун давомида шиддатли курашларга бой бўлган Георгий Агзамов хотирасига бағишланган XVIII “Tashkent open-2025” халқаро турнири якунланди.
Мукофот жамғармаси 75 минг АҚШ долларидан иборат халқаро турнирнинг “А” гуруҳидаги сўнгги 10-туридаги марказий учрашувда ҳамюртимиз Шамсиддин Воҳидов оқ доналарда Ниҳал Сарин билан рўбарў келди.
Қизиқарли ўтган баҳсда ўтган йили Тошкентда кечган “Президент кубоги” турнирида 1-ўринни эгаллаган ҳиндистонлик Сарин ғалабага тенг дурангга эришиши натижасида 8 очко жамғарган ҳолда халқаро турнир ғолиблигини қўлга киритди.
Ушбу турда Абхиманью Пураник(Ҳиндистон) –Александр Инджич (Сербия), Нараянан Сунилдут Лайн(Ҳиндистон) – Санан Сюгиров(Венгрия) қарама-қаршилигидаги ўйинларда томонлар муроса йўлини танлаши натижасида 3 нафар шахматчи: Сюгиров, Пураник ва Воҳидов 7,5 очкога эга бўлди.
Бу эса ўтган турлардаги натижалар сарҳисобига кўра, қўшимча кўрсаткичлар эвазига Санан Сюгировнинг иккинчи, Абхиманью Пураникнинг учинчи ҳамда Шамсиддин Воҳидовнинг 4-ўриндан жой олишига олиб келди.
Айтиш лозим, турнирнинг “А” гуруҳида 16 давлатдан 158 нафар шахматчи иштирок этган бўлса, уларнинг 106 нафари халқаро унвон соҳиблари эканлиги ҳам мусобақаларнинг ҳар бир турида очколар учун кураш муросасиз кечишини таъминлади.
Ўзбекистон терма жамоаси аъзоларидан Ҳумоюн Бекмуратов 7 очко билан қўшимча кўрсаткичларга кўра, 9-ўринни, Алмас Раҳматуллаев 13-ўринни, Муҳаммадзоҳид Суяров 15-ўринни, Муҳиддин Мадаминов 16-ўринни эгаллади.
Ҳамюртларимиздан Ҳумоюн Бекмуратов Халқаро гроссмейстерлик унвонининг 2-талабини, Баҳром Баҳриллаев Халқаро тоифадаги спорт устаси унвонининг барча талабларини бажаришга муваффақ бўлгани эътиборли бўлди.
XVIII “Tashkent open-2025” халқаро турнирининг “В” гуруҳида 8 давлатдан 185 нафар спортчи иштирок этган бўлса, 10-тур якунларига кўра, ғолибликка 8 очко жамғарган ҳамюртимиз Муҳаммадсолиҳ Раҳматуллаев эришди. 2-ўринни озарбайжонлик Эмил Меҳраилиев(8 очко), 3-ўрин терма жамоамиз аъзоси Рустамбек Эркиновга насиб этди.
Т.Рўзиев, ЎзА