Украина армияси бош қўмондони Александр Сирский фронтдаги вазият оғирлашгани, Россия Запорожьедаги учта аҳоли пунктини эгаллаб олганини айтди.
“Душман ҳозир Покровский йўналишида фаол ҳаракат қилмоқда. Бугун жангларнинг тахминан 40 фоизи айнан шу ҳудудга тўғри келди. Душман у ерда барқарор равишда катта йўқотишларга дуч келмоқда”, деди Сирский.
Ҳиндистон декабрь ойида етказиб бериладиган Россия нефтини харид қилишни қисқартирди. Бу ҳақда Bloomberg хабар берди. Маълум қилинишича, бу ҳолат “Ғарб санкциялари ва АҚШ билан олиб борилаётган савдо музокаралари Ҳиндистоннинг нефть импорти таркибига сезиларли таъсир кўрсатаётганидан далолат беради”. Бир вақтнинг ўзида бешта йирик нефтни қайта ишлаш компанияси келгуси ой учун Россия нефтига буюртма бермаган. Бу одатда 10 ноябрга қадар амалга оширилар эди.
Эронда аёллар спорт мураббийи Хания Шариати Рудпошти рўмол ўрамасдан омма олдида акробатик ҳаракатларни амалга оширганидан кейин қўлга олинди. Бу ҳақда Iran International хабар берди. Маълум қилинишича, мамлакатда мажбурий ҳижоб тўғрисидаги қонунни қўллаш давом этмоқда. Норвегиянинг Hengau инсон ҳуқуқлари ташкилоти спортчи 9 ноябрь куни кечқурун ҳибсга олинганини таъкидлади.
Германия полицияси таниқли сиёсатчиларни ўлдиришга чақирувчи даркнет платформасини юритганликда гумонланувчи эркакни қўлга олди. Бу ҳақда прокуратура маълумотига таяниб, Al Jazeera хабар берди. Германия махфийлик қоидаларига мувофиқ, “Мартин С.” деб тан олинган Германия-Польша фуқаролигига эга шахс 10 ноябрь куни ушланган. У кечқурун Дортмунд шаҳрида ҳибсга олинган. Эркакнинг ўта ўнг Реич Cитизенс ҳаракати билан алоқалари борлигини маълум қилди.
Хитойда 130 мингга яқин одамни алдаган йирик молиявий пирамиданинг ташкилотчиси Британияда 11 йилдан ортиқ муддатга озодликдан маҳрум этилди. Бу ҳақда Sky News хабар берди. Гап криптовалюта орқали фирибгарлик йўли билан олинган даромадларни ювишда айбдор деб топилган Қиан Жимин (Яди Чжан номи билан ҳам танилган) ҳақида кетмоқда. Тергов давомида Британия полицияси 61 мингдан ортиқ биткоинни мусодара қилган. Уларнинг бугунги қиймати 6 миллиард доллардан ошади — бу Британия тарихидаги энг йирик криптовалюта мусодарасидир.
<iframe width="650" height="420" src="https://www.youtube.com/embed/hZUA5XeHYOI" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА