Россия парламентига мигрант болалар учун мактабларда ўқишни пуллик қилишни назарда тутувчи қонун лойиҳаси киритилди. Бу ҳақда “РИА Новости” хабар берди. Депутатлар “Россияда таълим тўғрисида”ги федерал қонуннинг 78-моддасига ўзгартириш киритишни таклиф қилинмоқда. Унга кўра, чет элликлар мактабгача, бошланғич, ўрта умумий ҳамда ўрта махсус таълимни пуллик асосда олади.
Эронда 11 нафар эрини ўлдирганликда айбланаётган Колшум Акбарийга қарши суд жараёни бошланди. Бу ҳақда Al Arabiya хабар берди. Жиноятлар 2001 йилдан 2023 йилгача содир этилган. Акбарийнинг 20 дан ортиқ турмуш ўртоғи бўлган, уларнинг аксарияти вафот этган. Терговчилар фикрича, аёл эрларини ўлдириб, ҳар сафар уларнинг меросига эга чиққан. Акбарий дастлабки қотилликларидан бирида эрини техник спирт билан заҳарлаган, сўнгра ёстиқ билан бўғиб ўлдирган. Шундан кейин у марҳумнинг катта ер майдонини мерос сифатида қўлга киритган.
АҚШнинг Монтана штатида 11 август куни иккита самолёт тўқнашганидан кейин ёниб кетди. Бу ҳақда Associated Press хабар берди. Ҳодиса Калиспел сити аэропортининг учиш-қўниш йўлагида юз берган. Бортида учувчи ва 3 нафар йўловчиси бўлган самолёт тўхтаб турган учоққа бориб урилган. Авиатехникалар жиддий шикастланмаганига қарамай, ёнғин чиққан. Воқеа жойига етиб келган ўт ўчирувчилар алангани ўчиришга муваффақ бўлган.
Туркиянинг Баликесир вилоятида 10 август куни 6,1 магнитудали кучли зилзила юз берди. Ер силкиниши оқибатида қулаб тушган бино эгаси ва қурувчиси қўлга олинди. Айбланувчилар 11 август куни эҳтимолий бепарволик бўйича тергов доирасида ушланган. Зилзила сабабли Синдирғи шаҳридаги 3 қаватли уй қулаб, 81 ёшли эркак вафот этган. Провинция бўйлаб жами 29 киши жароҳатланган.
Озарбайжон ва Арманистон Ташқи ишлар вазирликлари 8 август куни имзоланган тинчлик декларация матнини эълон қилди. Эндиликда ҳужжатни икки давлат етакчиси Илҳом Алиев ва Никол Пашинян ратификация қилиши лозим. Иккала сиёсатчи ҳам Оқ уйда Дональд Трамп билан учрашувда декларацияни имзолаган. Ўшанда улар шартномани ратификация қилиш ниятини билдирганди
Санкт-Петербург губернатори Александр Беглов мигрантларга курерлик фаолияти билан шуғулланишни тақиқлади. Сиёсатчи тегишли қарорни имзолади. Маълум қилинишича, қарор Россия фуқароларини ишга жалб қилишга қаратилган. Таъкидланишича, бу чора етказиб бериш бозорига таъсир кўрсатмайди. Сабаби соҳадаги мигрантлар улуши юқори эмас. Иш берувчиларга “кадрлар сиёсатини мослаштиришлари” учун уч ойлик муҳлат берилган.
<iframe width="640" height="480" src="https://www.youtube.com/embed/KYS9KhJKM8c?si=ArbesONd_PfRW11v" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА