АҚШ президенти Дональд Трамп 8 август куни Озарбайжон президенти Илҳом Алиев ва Арманистон бош вазири Никол Пашинян билан Вашингтондаги Оқ уйда учрашув ўтказади.
Бу ҳақда манбаларга таяниб, The Washington Post хабар берди. Учрашув натижасида бир неча йиллардан бери зиддиятда бўлган Озарбайжон ва Арманистон тинчлик келишувига эришиши кутилмоқда. Пашинян 7-8 август кунлари Вашингтонга ташриф буюриши тасдиқланган. Арманистон ҳукуматига кўра, вазир “минтақада тинчлик, фаровонлик ва иқтисодий ҳамкорликни ривожлантириш учун” Трамп ва Алиев билан уч томонлама учрашув ўтказади.
АҚШнинг Аризона штатида 6 август куни тиббий самолёт қулаб тушиши оқибатида тўрт киши ҳалок бўлди. Бу ҳақда CNN хабар берди. Маълум қилинишича, ҳодиса Чинле аэропорти яқинида юз берган. Икки винтли кичик тиббий самолёт қулаб тушгач, ёниб кетган. Бортда ҳалок бўлганлар маҳаллий аҳоли вакиллари эмас, уларнинг ўлимини шифокорлар тасдиқлаган. Самолёт Нью-Мексико штатининг Албукерк шаҳридаги шифохонадан беморни олиб кетиш учун кетаётган бўлган.
Россия ҳарбийлари томонидан Украинага қарши қўлланаётган Shahed-136 дронларида Ҳиндистонда ишлаб чиқарилган қисмлар топилди. Бу ҳақда Украина президенти офиси раҳбари Андрей Ермак маълум қилди. Текширувга кўра, дроннинг қувват блокида Ҳиндистонда йиғилган, халқаро Vishay Intertechnology компанияси ишлаб чиқарган кўприк тўғрилагич модули ўрнатилган. Сунъий йўлдош навигацияси антеннасида эса Ҳиндистондаги Aura Semiconductor компаниясининг чипи қўлланган. Украина бу масала бўйича камида икки марта Ҳиндистон Ташқи ишлар вазирлигига мурожаат қилган.
Хитой ҳарбий авиацияси янги босқичга қадам қўймоқда, ижтимоий тармоқларда учиш синовларидан ўтаётган янги жанговар самолёт сурати пайдо бўлди. Кадрларда самолёт иккита ҳаво кириш жойига эга эканини кўриш мумкин. Бу унинг иккита двигателли бўлиши эҳтимолини оширади. У учбурчаксимон қанот, чўзинчоқ бурун ва корпус билан бир бутунлашган фюзеляжга эга. Бундай конструкция радарда аниқланиш эҳтимолини кескин камайтиради. Одатда бу турдаги учоқлар узоқ масофали зарба берувчи операцияларда иштирок этади.
“Ҳизбуллоҳ” ҳаракати раҳбари Наим Қосим 5 август куни тўғридан тўғри Исроилга таҳдид қилди. У телемурожаат орқали агар яҳудий давлати Ливанга ҳужум бошласа, “Ҳизбуллоҳ” бунга ракетали зарба билан жавоб беришини айтди. Бу ҳақда Al Arabiya хабар берди. Мазкур баёнот Ливан ҳукумати “Ҳизбуллоҳ”нинг қуролланишини чеклаётган пайтда янгради. Айни пайтда эса АҚШ Теҳрон томонидан қўллаб-қувватланадиган гуруҳни қуролсизлантириш бўйича Байрутга босим ўтказмоқда.
Россиянинг Камчатка яриморолида жойлашган Рйбачий ядровий сувости кемалари базасига ўтган ҳафтадаги кучли зилзила оқибатида жиддий зарар етгани маълум бўлди. Бу ҳақда сунъий йўлдош тасвирларига таяниб, The Guardian хабар берди. Planet Labs компанияси томонидан олинган сунъий йўлдош суратларига кўра, Рйбачий сувости кемалари базасидаги сузувчи пирслардан бири жиддий шикастланиб, унинг қисмларидан бири маҳкамланган нуқтадан ажралиб чиқиб кетган. Мазкур зарар хабарига Россия Мудофаа вазирлиги ҳозирча изоҳ бермаган.
<iframe width="640" height="420" src="https://www.youtube.com/embed/EfhVwsGXP8Q" title="XALQARO DAYJEST" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА