Украина Россия билан урушнинг якунига яқинлашмоқда. Бунга энг аввало АҚШ президенти Дональд Трампнинг саъй-ҳаракатлари ёрдам бермоқда. Бу ҳақда Украина президенти Владимир Зеленский журналистларга берган интервьюсида маълум қилди. Зеленский Украинадаги вазият дунёда ўхшаши йўқлигини ва унинг кўлами бошқа қуролли можаролардан анча катта эканини таъкидлади.

Суриядаги Россиянинг иккита ҳарбий базаси тақдири номаълумлигича қолмоқда. Сурия президенти Аҳмад аш-Шараъанинг Москвага ташрифи ва россиялик ҳамкасби Владимир Путиннинг “дўстлик” таклифига қарамай, бу масала ҳал бўлмади. Бу ҳақда Asharq Al-Awsat нашри хабар берди. Сурия ташқи ишлар вазири Асаад аш-Шибонига кўра, томонлар ҳозирда шартномаларни, жумладан ҳарбий базалар масаласини қайта кўриб чиқиш бўйича музокаралар олиб бормоқда. У аввалги ҳокимият даврида Россия билан тузилган барча келишувлар тўхтатилгани ва энди қабул қилинмаслигини айтди. Янги битимлар эса ҳозирча имзоланмаган.

АҚШ президенти Дональд Трамп урушни тугатиш учун Украинанинг Донбасс ҳудудини “бўлиш” кераклигини айтди. Унинг фикрича, ҳудуднинг катта қисми Россия назорати остида қолади. Бу ҳақда Deutsche Welle хабар берди.

“Ҳаммаси ҳозиргидек қолаверсин. Ҳозир у аллақачон бўлинган. Менимча, минтақанинг 78 фоизи Россия томонидан эгалланган. Кейинчалик улар ўзаро бирор нарсани келишиб олиши мумкин. 

Аммо ҳозир можаронинг иккала томони ҳам фронт чизиғида тўхташи керак — уйларига тарқалиши, жанг ҳаракатларини тўхтатиши, одамларни ўлдиришни бас қилиши лозим”, деган Трамп журналистлар билан суҳбатда.​

Хитой АҚШ Миллий хавфсизлик агентлигини унинг Миллий вақт хизмати марказига киберҳужум уюштирганликда айблади. Бу ҳақда ABC News хабар берди.

Марказ Шенси провинциясининг Сиан шаҳрида жойлашган. У Пекин вақтини белгилаш, сақлаш ва узатиш учун жавобгардир. Бундан ташқари алоқа, молия, электроэнергетика, транспорт, геодезия ва картография, миллий мудофаа каби соҳаларда вақт синхронизацияси хизматларини кўрсатади. Шунингдек, халқаро минтақавий вақтни ҳисоблаш учун маълумотларни тақдим этади.

Гонконг халқаро аэропортида юк самолёти учиш-қўниш йўлагидан ташқарига чиқиб кетиб, денгизга қулаган. Бу ҳақда South China Morning Post хабар берди. Ҳодиса 20 октябрь куни БААга тегишли Boeing 747 самолёти билан содир бўлган. У учиш-қўниш йўлагидан ташқарига чиқиб кетиб, эҳтимол, қуруқликдаги транспорт воситасини уриб юборган ва денгизга қулаган.

<iframe width="650" height="420" src="https://www.youtube.com/embed/ufMYlDl1UjI" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА