Арманистон бош вазири Никол Пашинян унинг мамлакати Евросиё иқтисодий иттифоқидан чиқиши (ЁИИ)мумкинлигини айтди. Пашинян мамлакатнинг Европа интеграциясига интилишини ҳисобга олиб, шундай фикр билдирди.
“Биз бир вақтнинг ўзида Европа Иттифоқи ва ЁИИга аъзо бўлиш мумкин эмаслигини тушунамиз. Якуний танлов вақти келганда, биз тегишли қарор қабул қиламиз”, деди бош вазир.
Европа етакчилари Россия ва Украина фронт чизиғи бўйлаб 40 километрли хавфсизлик (буфер) зонасини яратиш имконини кўриб чиқмоқда. Режага кўра, зона ҳарбий ҳаракатлардан холи бўлади ва у оташкесим ёки урушдан кейинги келишув доирасида амалга оширилиши мумкин. Бу ҳақда Политико хабар берди. Маълум қилинишича, Россия бу ғояни қўллаб-қувватламоқда, аммо зона қанчалик катта бўлиши мавҳумлигича қолмоқда. АҚШ бу муҳокамаларда ҳозирча иштирок этмаяпти.
Россия Эрон ядровий инқирози бўйича баёнот бериб, ушбу вазият учун АҚШни, хусусан, президент Дональд Трампни айблади. Бу ҳақда Россиянинг БМТдаги элчиси Дмитрий Полянскийга таяниб, Fox News хабар берди. Полянскийнинг фикрича, АҚШнинг 2018 йилда Эрон билан 2015 йилда имзоланган ядровий битимдан чиқиши бугунги инқирозга сабаб бўлган.
БМТ Инсон ҳуқуқлари бўйича Олий комиссари Bолкер Тюрк идорасидаги юзлаб ходимлар унга мурожаат қилиб, Ғазодаги урушни «аниқ равишда давом этаётган геноцид» сифатида тасвирлашни сўради. Бунга қадар кўплаб инсон ҳуқуқлари ташкилотлари ва БМТнинг мустақил экспертлари Исроилнинг уруши – Фаластин халқини геноцид қилиш эканини тан олган. Исроил Ташқи ишлар вазирлиги эса БМТ ички ходимларининг хатларига «улар Исроилга нисбатан кўр-кўрона нафрат билан йўғрилгани сабабли» жавоб бермаслигини билдирди. Маълумот учун, Исроил илгари ҳам Ғазодаги геноцид айбловларини рад этганди.
Жанубий Кореяда махсус прокурорлар гуруҳи собиқ президент Юн Сок Ёлнинг рафиқаси Ким Гон Хига расмий айблов эълон қилди. Бу ҳақда Yonhap ахборот агентлиги хабар берди. Собиқ биринчи хоним коррупция ва порахўрликда айбланмоқда. У “Капитал бозори тўғрисида”ги қонун, “Сиёсий маблағлар тўғрисида”ги қонун ҳамда воситачилик учун пора олишни тақиқловчи қонунни бузганликда гумон қилиниб, қамоққа олинган.
<iframe width="650" height="420" src="https://www.youtube.com/embed/21PKrTqywL0" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА