Европа Иттифоқи аэропортларида ҳар қандай суюқликлар ҳажмини 100 миллилитр билан чеклаш талаби тез орада бекор қилиниши мумкин. Бу ҳақда Еврокомиссия маълумотларига таяниб, Euronews хабар берди. Таъкидланишича, тегишли ўзгариш аэропортларга янги авлод хавфсизлик ускуналарининг ўрнатилиши билан боғлиқ. Аввалига 100 мл суюқлик чеклови анъанавий рентген қурилмалари суюқ портловчи моддаларни аниқлай олмагани учун жорий қилинган эди. Энди эса портловчи моддаларни аниқлаш имконини берувчи замонавий сканерлар пайдо бўлган.

Италиянинг Пиедмонт округида бир йилга яқин вақт давомида бедарак йўқолган 64 ёшли шифокор Никола Ивалдонинг жасади сунъий интеллект ёрдамида топилди. Маълум қилинишича, Италия Миллий Алп ва ғор қутқарув хизмати 1 йил давомида Никола Ивалдони қидирув ишларини олиб борган. Аммо анъанавий қидирув усуллари натижа бермагач, жараёнга замонавий дронлар жалб қилинган. 2 та дрон 29 июль куни 5 соат мобайнида Пиедмонт округидаги ўрмон ҳудудларини кузатган. Сўнгра қутқарувчилар бу тасвирларни СИга юклаган ва натижада дарҳол “шубҳали нуқталар” аниқланган.

АҚШ бир килограммли олтин қуймалар импортига бож жорий этди. Натижада олтин нархи тарихдаги энг юқори даражага кўтарилди. Бу ҳақда Reuters хабар берди. Жаҳон бозорида спот-олтин бир унсия учун 3 394,36 доллар даражасига етди. Бу 23 июлдан бери энг юқори кўрсаткич ҳисобланади. Ҳафта бошидан бери олтин нархи қарийб 1 фоизга ошган. 

Хитойнинг қайта фойдаланиладиган ракетаси синов парвози вақтида қулаб тушди. Бу ҳақда вазиятдан хабардор манбаларга таяниб, South China Morning Post хабар берди. Тахминларга кўра, ҳодиса июль ойи охирида Ички Мўғулистон районидаги полигонда юз берган. Сунъий йўлдош тасвирларида старт майдончаси яқинида ёнғин излари кўринади. Ўша куни вертикал учиш ва қўниш синови ўтказилган, бироқ парвоз “муваффақиятсизлик билан якунланган”. Портлаш излари ракета қўниши керак бўлган жойдан юзлаб метр узоқда аниқланган.

АҚШ президенти Дональд Трамп яқин кунларда Россия раҳбари Владимир Путин билан урушни тугатиш бўйича музокаралар олиб боради. CNN нашри учрашувдан сўнг Украинадаги уруш якунланишининг 5 та эҳтимолий сценарийсини эълон қилди.

Мазкур сценарийлардан фақат биттаси Украина учун ижобий ҳисобланади. Шунга қарамай, уларнинг ҳеч бири Киевнинг иштирокисиз амалга ошмайди. Булар: Ўт очишни тўхтатиш, Муддати узайтирилган музокаралар, Украина яна икки йил урушга бардош бериши, Украина ва НАТО учун фалокат, Путин учун ҳалокат: Афғонистон сценарийси

Ҳарбий ресурсларнинг тугаши, санкцияларнинг кучайиши, Хитой ва Ҳиндистоннинг қўллаб-қувватлови заифлашиши ҳамда элита ичидаги норозилик Россияни урушни тугатишга мажбурлаши мумкин. Оқибатда Москва Афғонистонда бўлгани каби Украинадан ўзи чиқиб кетади.

Исроил 7 август куни Ливаннинг шарқий ҳудудларига дронлар ёрдамида авиаҳужум уюштирди. Оқибатда 6 киши ҳалок бўлиб, яна 10 киши яраланди. Бу ҳақда Anadolu хабар берди.

Шу пайтгача икки давлат орасида 2024 йил охиридан бери ўт очишни тўхтатиш келишуви амалда эди. Аммо ушбу сўнгги ҳужум бу келишувнинг бузилганини англатмоқда. Ливан соғлиқни сақлаш вазирлигининг билдиришича, яҳудий давлатининг ҳужуми оқибатида Бекаа водийсидаги Ал-Масна халқаро йўлида автомобилга зарар етган. Ҳодисада 5 киши ҳалок бўлган ва яна 10 киши жароҳатланган. Яна бир дрон зарбаси Кфар Дан шаҳрида Ливан фуқаросини ҳаётдан олиб кетган. Ушбу дрон ҳужумига учраган эркак уйининг ташқарисида турган бўлган.

<iframe width="650" height="420" src="https://www.youtube.com/embed/7CRAyoSP1tc" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА