Ассалому алайкум. Ўзбекистон Миллий ахборот агентлиги виртуал мухбири сизларни ўтган ҳафтада содир бўлган муҳим воқеа ва ҳодисалар тафсилотлари билан таништиради.

<iframe width="650" height="420" src="https://www.youtube.com/embed/ybGnGbbqJ-Y" title="Haftalik dayjest 27.01.2025 - 03.02.2025" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Йигирма бешинчи январ куни Ўзбекистон Республикаси Президенти Шавкат Мирзиёев Тошкент вилоятидаги "Амирсой" курорт мажмуасида Қирғизистон Президенти Садир Жапаров билан норасмий учрашув ўтказди. Етакчилар икки томонлама муносабатларнинг долзарб масалалари, шунингдек, халқаро сиёсат ва минтақавий ҳамкорлик юзасидан фикр алмашдилар. Ўзбекистон ва Қирғизистонда мамлакатларимизнинг ноёб геоландшафти ва хилма-хил табиатини ҳисобга олган ҳолда курорт-рекреация марказларини ташкил этишга қаратилган қўшма лойиҳаларни илгари суришга келишиб олинди.

***

Президент Шавкат Мирзиёев йигирма тўққизинчи январ куни қурилиш ишлари якуний босқичга кирган Ўзбекистондаги Ислом цивилизацияси марказида олиб борилаётган бунёдкорлик ишлари билан танишди.

***

Ўттизинчи январ куни Шавкат Мирзиёев Тошкент шаҳрида Ўзбекистон Республикасининг Биринчи Президенти Ислом Каримов ҳайкали пойига гулчамбар қўйди. Маросимда Олий Мажлис палаталари, Президент администрацияси ва ҳукумат вакиллари, зиёлилар ва шаҳар жамоатчилиги ҳам қатнашди. Қуръон оятлари ўқилиб, дуо қилинди.

***

Ўзбекистон ҳамда Озарбайжон ҳукуматлари икки мамлакатга киришда ID-карталарни ўзаро тан олиш бўйича муҳокамаларни олиб бормоқда. Унга кўра, келгусида икки давлат фуқаролари хорижга чиқиш паспортини олмасдан туриб, ID-картанинг ўзи билан чегарадан ўта олади. Бу фуқаролар учун саёҳатни қулайлаштириб, ўзаро интеграцияни мустаҳкамлайди.

Маълумот учун, ҳозирда Ўзбекистон ҳамда Қирғиз Республикаси билан ID карталар орқали чегарадан ўтиш бўйича ўзаро келишувга эришилган ва бу тизим амалда ишлаяпти. Шунингдек, Шавкат Мирзиёев Марказий Осиё мамлакатлари миллий ID-карталарини ўзаро тан олиш таклифини илгари сурган эди.

***

Uzbekistan Airways компаниясининг Тошкентдан Нью-Йоркка учаётган самолётида чақалоқ туғилди

Йигирма саккизинчи январ куни Нью-Йоркка учаётган рейсдаги йўловчилардан бирида тўлғоқ бошланган. Йўловчилар орасида шифокор-акушер ва жарроҳ ҳам бор экан, ҳомиладор аёлга ёрдам кўрсатган. Аёл ўғил фарзандни дунёга келтирган. Шу сабабли экипаж Исландиянинг Кефлавик шаҳридаги захира аэродромига мажбурий қўнишни амалга оширган. Самолёт қўнганидан сўнг, аёл маҳаллий клиникага етказилган. Ушбу воқеа авиакомпаниянинг 33 йиллик юбилейи куни содир бўлди.

***

Бугунга етказмоқчи бўлган хабарларимиз шулардан иборат. Ўзбекистон Миллий ахборот агентлигини кузатишда давом этинг.