Франция ва Италияда гандбол бўйича ўтаётган халқаро мусобақаларда Ўзбекистон U-18 қизлар ва ўғил болалар жамоалари муносиб натижаларни қайд этмоқда.

Италиянинг Терамо шаҳрида ўтаётган “52th Interamnia World Cup” турнирида Республика олимпия ва паралимпия спорт турларига тайёрлаш маркази гандболчилари мамлакатимиз шарафини ҳимоя қилаётган бўлса, Францияда қизлар жамоалари ўртасидаги “Paris World Games” ўйинларида Ўзбекистон U-18 қизлар терма жамоаси қатнашмоқда.

Кеча Терамо шаҳрида давом этаётган “52th Interamnia World Cup” баҳсларида ҳамюртларимиз еттинчи учрашувда Германиянинг TV 1893 “Neuhausen” жамоасини 30:22 ҳисобида енгди ва очколари сонини 21 тага етказиб олди.

Бугун, 11 июль куни гандболчиларимиз турнирдаги асосий рақиби 21 очкога эга “Juno H. Aventure” (Франция) жамоаси билан куч синашади.

“Paris World Games” мусобақаларида қатнашаётган Ўзбекистон U-18 қизлар терма жамоаси бугун “Пьер Де Кубертен” номидаги стадионда ўтадиган финал ўйинида Франциянинг “Dole-Choussin” жамоасига қарши майдонга тушади.

“Dole-Choussin” гандболчилари кеча ўтказилган ярим финалда “Sarcelles-Villiers Le Bel” жамоасини 16:14 ҳисобида мағлуб этган бўлса, ҳамюртларимиз “Pays De Lesneven Handball” жамоасини 18:9 ҳисобида енгиб, финалга йўл олди.

Т.Рўзиев,

ЎзА