Бугун, 1 май куни футзал бўйича Ўзбекистон аёллар терма жамоаси Осиё кубоги финал босқичида иштирок этиш учун Хитойга йўл олди.

Айтиш лозим, учинчи бор ташкил этилаётган қитъа чемпионатида 12 та жамоа иштирок этади. Ўзбекистон терма жамоаси қизлари “А” гуруҳида Хитой, Хитой Тайпейи ҳамда Австралия терма жамоалари билан рақобатга киришади.   

Куни кеча Ўзбекистон футзал федерацияси президенти Бекзод Маматқулов, Ўзбекистон футбол ассоциацияси раиси маслаҳатчилари Бахтиёр Абдуллаев ҳамда Аваз Азизхўжаев Осиё кубоги финал босқичи сафарига отланган терма жамоа аъзолари билан учрашиб, мазкур баҳснинг аҳамияти хусусида сўз юритди. Футболчи қизларимизга нуфузли мусобақада омад тилади.  

Ўз навбатида, терма жамоамиз аъзолари, мураббий-мутахассислар кубок баҳслари келгусида ўтадиган Олимпия ўйинларининг саралаш мусобақалари олдидан муҳим эканлигини билдириб, халқимиз ишончини оқлаш, муносиб натижаларга эришиш йўлида ҳаракат қилишини билдирди.   

Тадбирда айтилганидек, Ўзбекистон терма жамоаси Осиё кубогининг доимий иштирокчиларидан бири саналади. Футзалчи қизларимиз 2015 йилги қитъа биринчилигида ўз гуруҳида Ҳонгконг билан дурангга эришиб, Малайзия ҳамда Эронга имкониятни бой берганди. 2018 йилги қитъа чемпионатида ҳамюртларимиз чорак финалгача етиб борганди.   

Қитъа чемпионатининг “В” гуруҳидан Эрон, Вьетнам, Ҳонгконг, Хитой, Филиппин жой олган бўлса, “С” гуруҳида Таиланд, Япония, Индонезия, Баҳрайн курашга киришади.   

Кубок ўйинига 6 май куни Ўзбекистон – Хитой Тайпейи учрашуви билан старт берилади.   

Эслатиб ўтамиз, Хитойнинг Хух-Хото шаҳрида ўтадиган Осиё кубоги баҳслари 6-17 май кунлари бўлиб ўтади.   

Қитъа кубогида совринли ўринларни эгаллаган 3 та терма жамоа жорий йилнинг ноябрь ойида Филиппинда футзал бўйича ўтадиган биринчи аёллар жаҳон чемпионати йўлланмасини қўлга киритади.   

Т.Рўзиев, ЎзА