Бугун, 16 февраль куни Ўзбекистон U-20 терма жамоаси Хитойда давом этаётган Осиё кубогидаги иккинчи учрашувида майдонга тушади.

Ёш футболчиларимиз “С” гуруҳининг илк турида Эрон терма жамоасига 0:3 ҳисобида имкониятни бой берган Индонезия U-20 жамоаси билан куч синашади. Бугун куннинг иккинчи ярмида Тошкент вақти билан соат 16:30 да бошланадиган ўйин Шенчжендаги “Ёшлар футбол базаси марказий стадиони“да ўтказилади.

Гуруҳнинг иккинчи жуфтлигидаги учрашувда Эрон – Яман жамоалари рўбарў келади.

Эслатиб ўтамиз, Фарҳод Нишонов бош мураббийлигидаги Ўзбекистон U-20 термаси илк турда Яманни 1:0 ҳисобида мағлубиятга учратганди.

Т.Рўзиев, ЎзА