Фунг Вонг тўфони қурбонлари 27 кишига етди
Филиппинда содир бўлган Фунг Вонг тўфони таъсирида содир бўлган тошқин ва кўчкилар қурбонлари сони 27 нафарга етди.
"Inquirer News" табиий офатлар хавфини камайтириш ва бошқариш миллий кенгашига таяниб хабар беришича, 36 киши жароҳатланган, 2 фуқаронинг тақдири ҳали номаълум.
Қайд этилишича, ушбу табиий офат мамлакатнинг 15 ҳудудида 2,4 миллиондан кўп аҳолига зарар етказган. Аввалроқ “Калмаэги” тўфони 232 кишининг ҳаётига зомин бўлган эди. Филиппин Президенти кичик Фердинанд Маркос 6 ноябрь куни фавқулодда вазиятларни бартараф этиш идораси расмийлари билан учрашгач, ҳолатни ўнглаш мақсадида “миллий офат декларацияси”ни эълон қилди.
Эслатиб ўтамиз, 2013 йил ноябрь ойида Жануби-шарқий Осиёнинг мазкур давлатига “Хайян” тўфони ёпирилиб, 7300 дан зиёд инсоннинг ёстиғини қуритган эди.
Г.Сатторова, ЎзА