2026 йилнинг 11 июнь кунидан 19 июль санасигача АҚШ, Канада ва Мексика мамлакатларида футбол бўйича Жаҳон чемпионати ўйинлари ўтказилишидан хабарингиз бор.

Мазкур мусобақа бошланишига оз муддат қолаётгани боис, дунё узра чемпионат ҳақида турли хабарлар урчимоқда. Ушбу хабарлардан бири,  мусобақадаги учрашувлар учун чиқарилган чипталарнинг сотуви ҳақида бўлди.  

Халқаро футбол ассоциациялари федерациясининг (ФИФА) берган хабарига кўра, айни дамда Жаҳон чемпионатининг 1 миллиондан ортиқ чипталари сотилган ва бу рақамлар кун сайин ортиб бормоқда. Спортдаги энг муҳим тадбирлардан бири бўлган мазкур чемпионатга 212 мамлакатдан мухлислар ташриф буюриши кутилмоқда.

Эслатиб ўтамиз, гуруҳ ўйинлари учун чипталар нархи 60-105 АҚШ долларидан 410-620 АҚШ долларигача баҳоланган. Нью-Жерсида бўлиб ўтадиган финал учун 1-тоифали чипталар 6730, 2-тоифа 4210, 3-тоифа 2790, 4-тоифа эса 2030 АҚШ доллари этиб белгиланган. Чипталар нархи янада кўтарилиши мумкин.  

Маълумот ўрнида: мундиалда 48 та терма жамоа 4 тадан 12 та гуруҳга бўлинган ҳолда иштирок этади. Гуруҳларда дастлабки икки ўринни эгаллаган ва учинчи ўринни эгаллаган энг яхши саккизта жамоа навбатдаги босқичга йўл олади.  

Жавоҳир Тошхўжаев, ЎзА