Фавқулодда вазиятлар вазирлиги академиясида “Фавқулодда вазиятларда баланд қаватли бинолардан инсонларни қутқаришдаги мавжуд муаммолар ва уларнинг инновацион ечимлари” мавзусида Республика илмий-техник анжумани ўтказилди.
Анжуман мамлакатимизда Фавқулодда вазиятлар вазирлиги академияси курсантларининг билим ва кўникмаларини ошириш, назария ва амалиёт уйғунлигини таъминлаш, баланд қаватли биноларнинг ёнғин хавфсизлигини таъминлаш борасида амалга оширилаётган ишлар билан танишиш ҳамда бугунги кунда қурилаётган баланд қаватли биноларда ёнғин хавфсизлигини таъминлашнинг муаммо ва ечимларини ўрганиш мақсадида ташкил этилди.
Тадбирда Фавқулодда вазиятлар вазирлиги томонидан бугунги кунда амалиётда қўлланилиб келинаётган замонавий ёнғин ўчириш ва қутқарув техникалари, шунингдек, олий ҳарбий ва ҳарбийлаштирилган таълим муассасалари томонидан тайёрланган макет ва илмий-инновацион ишланмаларнинг кўргазмаси намойиш этилди.
Шундан сўнг иштирокчилар биноларда ёки уларнинг ички қисмида ўрнатиладиган стационар қутқарув воситаларини ишлаб чиқиш, транспортда жиҳозланган қутқарув воситаларини қўллаш, биноларда сақланадиган ва ёнғин вақтида қўлланиладиган қутқарув воситаларини яратиш ҳамда ёнғин-қутқарув автомобилларида ташилувчи кўчма қутқарув воситаларини такомиллаштириш, ҳориж тажрибасини инобатга олган ҳолда баланд қаватли бинолардан инсонларни қутқариш учун ўзига хос ёнғин-қутқарув техникалари, аслаҳа-анжомлари, қутқарув воситаларини яратиш, уларни фавқулодда вазиятларни бартараф қилиш амалиётига янада кенг жорий этиш масалалари муҳокама этилди.guln
Замонавий баланд қаватли биноларда юзага келиши мумкин бўлган фавқулодда вазиятларда инсонларнинг эвакуациясини ташкиллаштириш, қутқарув воситаларидан самарали фойдаланиш юзасидан таклифлар ишлаб чиқиш белгиланди.
Анжуман якунида иштирокчилар ўзларини қизиқтирган саволларга соҳа мутахассисларидан атрофлича жавоблар олишди.
Фавқулодда вазиятларда баланд қаватли бинолардан инсонларни қутқаришдаги мавжуд муаммолар ва уларнинг инновацион ечимлари бўйича таклиф ва тавсиялар билдирилди.
Гулноза Бобоева,
ЎзА