Фаластин ахборот агентлиги – WAFA “Ўзбекистон мустақил Фаластин давлатини барпо этиш зарурлиги ҳақидаги қатъий ва принципиал позициясини яна бир бор таъкидлади” сарлавҳали мақола эълон қилди.

Мақолада Президент Шавкат Мирзиёев Парламентлараро иттифоқнинг150-юбилей Ассамблеяси ялпи мажлисида нутқ сўзлаб, қатор долзарб мавзуларга тўхталиб ўтгани, жумладан жаҳоннинг турли минтақаларидаги низолар глобал ва минтақавий тинчликка, хавфсизликка жиддий таҳдид солаётганини таъкидлаганига эътибор қаратилган. Давлатимиз раҳбарининг Ўзбекистон ҳар қандай зиддият ва қарама-қаршиликни фақат дипломатия ва тинч музокара йўли билан ҳал этишнинг қатъий тарафдори эканини яна бир бор эслатганига урғу берган.

– Умид қиламизки, Украина атрофидаги вазият бўйича бошланган музокара жараёни албатта ижобий натижаси беради, – дея иқтибос келтирган нашр мамлакатимиз етакчиси нутқидан. – Энг оғриқли муаммоларга халқаро ҳуқуқнинг умумэътироф этилган меъёрлари, Бирлашган Миллатлар Ташкилоти Низоми ва резолюциялари асосида ечим топиш муҳим, деб ҳисоблаймиз.
Мақолада Президентимиз “Жумладан, Фаластин – Исроил низосида ягона ва адолатли ечим “икки халқ учун – икки давлат” тамойилини рўёбга чиқаришдан иборат”, деганига урғу берилган.

Шунингдек, Тошкентдаги нуфузли анжуманда Миллий Кенгаш вице-президенти Муса Ҳадид бошчилигидаги делегация, жумладан Фаластиннинг Ўзбекистон ва Қирғизистондаги элчиси Жавод Муҳаммад Авод ҳам иштирок этгани қўшимча қилинган.

– Бутун дунёдан 200 га яқин делегация қатнашган мазкур йирик форум – жаҳоннинг энг йирик парламент платформасида иштирок этиш Фаластин давлати мавжудлигини намойиш этишда ҳам муҳим аҳамият касб этади, – деб ёзади муаллиф.

Муҳаррама Пирматова, ЎзА