Европа Кенгаши Президенти Антониу Кошта бугун Ўзбекистон Республикаси рақамли технологиялар вазири Шерзод Шерматов ҳамроҳлигида Бухорога келди.

Олий мартабали меҳмонни Бухоро темирйўл вокзалида Бухоро вилоят ҳокими Ботир Зарипов ва бошқа мутасаддилар кутиб олди. Ташриф дастурига мувофиқ Европа Кенгаши Президенти Бухоронинг тарихий-маданий ёдгорликлари билан яқиндан танишди, қадамжоларни зиёрат қилди.

Антониу Кошта Исмоил Сомоний мақбарасида бўлди. Меҳмонга мақбаранинг тарихи, бу ерда сўнгги йилларда амалга оширилган бунёдкорлик, таъмирлаш-тиклаш ишлари ҳақида батафсил маълумот берилди. Меҳмон мамлакатимизда маданий меросни асраб-авайлаш ишларига юқори баҳо берди ва давлатимиз раҳбари томонидан илгари сурилган ташаббусларни эътироф этди.

[gallery-22621]

Шундан сўнг меҳмон Арк қўрғонида ҳам бўлди. Делегациянинг навбатдаги манзили Пойи-Калон мажмуаси бўлди. Пойи-Калон Бухоронинг энг кўзга кўринган тарихий қадамжоларидан саналиб, нафақат Ўзбекистон, балки бутун Марказий Осиёнинг энг диққатга сазовор жойларидан. Тарихий ва меъморий обидалар олий мартабали меҳмонда катта қизиқиш ва ҳайрат уйғотди.

Европа Кенгаши Президенти Антониу Кошта Бухорога ташрифи чоғида Бухоро гиламчилик марказида бўлиб, бу ерда ипакдан тўқилаётган турли ҳажмдаги гиламларнинг тўқилиш жараёнини кузатди ва гиламдўзларнинг қўл меҳнати билан яралаётган меҳнат маҳсулига юқори баҳо берди. 
– Қойил қолмасдан илож йўқ. Нафис ва гўзал гиламларнинг тўқилиш жараёнини кузатиш кишига завқ бағишлайди. Ҳайратдаман, – дейди Европа Кенгаши Президенти. 

Меҳмонлар Бухоро шаҳрининг тарихий қисмида каштачилик, темирчилик, пичоқчилик ва бошқа ҳунармандчилик маҳсулотлари билан танишди. Бухоронинг қадимий ҳунармандлик анъаналарини акс эттирган бозор ва расталар уларга кўтаринки кайфият улашди.

Шунинг билан Европа Кенгаши Президенти Антониу Коштанинг Бухорога ташрифи якунланди. Мартабали меҳмон шу куннинг ўзида Самарқанд шаҳрига жўнаб кетди. 

Зариф Комилов, Тоҳиржон Истатов (сурат), ЎзА мухбирлари