Енгил атлетикачимиз Расулбек Дилмуродов Осиё чемпионати совриндори
Япониянинг Номи шаҳрида енгил атлетиканинг спортча юриш йўналиши бўйича катталар ўртасида ўтказилган Осиё чемпионатида Ўзбекистон терма жамоаси аъзоси муваффақиятли қатнашди.
Спортча юриш бўйича қитъанинг энг кучли енгил атлетикачилари иштирок этган чемпионатнинг эркаклар ўртасидаги баҳсларида ватанимиз шарафини ҳимоя қилган ҳамюртимиз Расулбек Дилмуродов марра чизиғини учинчи бўлиб кесиб ўтди ва бронза медалини қўлга киритди.
Маҳоратли спортчимиз Расулбек Дилмуродов мусобақада 1:25:31 натижа қайд этди. Таъкидлаш жоиз, Дилмуродов ушбу натижа билан Осиё чемпионатининг икки карра совриндорига айланди.
Чемпионатнинг аёллар ўртасида спортча юриш баҳсларида иштирок этган ёш атлетимиз Диана Яфасова 1:52:33 кўрсаткич эвазига кучлилар орасида маррага бешинчи бўлиб етиб келди.
Т.Рўзиев,
ЎзА
