Муносабат

Шу кунларда Ўзбекистон нуфузли халқаро анжуманларга мезбонлик қилиши кутилмоқда. Хусусан, 3–4 апрель кунлари Самарқанд шаҳрида «Марказий Осиё — Европа Иттифоқи» биринчи саммити бўлиб ўтади. 

27 давлатни бирлаштирган Европа Иттифоқи Марказий Осиё билан минтақалараро даражада тизимли ҳамкорликни йўлга қўйган йирик тузилма ҳисобланади. «Марказий Осиё – Европа Иттифоқи» илк саммитининг айнан юртимизда — кўҳна Самарқандда ўтказилиши эса тарихий воқеликдир.

Ўзбекистон Республикаси Президенти Шавкат Мирзиёев Самарқанддаги мазкур саммит олдидан «Euronews»га интервью берди. Давлатимиз раҳбарининг мазкур интервьюси маҳаллий ва хорижий экспертлар, сиёсатчилар ва депутатлар томонидан кенг эътироф этилмоқда. 

Жумладан, Олий Мажлис Қонунчилик палатсининг бир гуруҳ депутатлари мазкур эксклюзив интервью мазмун-моҳияти ва аҳамияти, шунингдек, Марказий Осиё ва Европа Иттифоқининг ҳамкорлик масалалари ҳақида ўз муносабатини билдирди. 

Депутат Дурбек Аҳмедовнинг қайд этишича, Марказий Осиё ва Европа Иттифоқи ҳамкорлиги асосан уч йўналишда — минтақавий хавфсизлик, иқтисодий ҳамкорлик ҳамда иқлим ўзгариши масалаларида бўлиб, бу борада биргаликдаги ташаббуслар асосида тегишли чора-тадбирлар амалга оширилади.

Депутат Ойдин Абдуллаева эса давлатимиз раҳбари ўз интервьюсида Самарқанд асрлар давомида савдо, илм-фан ва дипломатия маркази, улкан мегаполис бўлганига урғу берганини таъкидлайди.

Таъкидлаш жоизки, Самарқанд саммити Европа Иттифоқи ва минтақамиз давлатлари ўртасида ҳамкорлик ва ўзаро боғлиқликнинг ривожланишида янги йўналишларни очади.

PS: Батафсил қуйидаги видеоҳавола орқали танишишингиз мумкин.

<iframe width="650" height="420" src="https://www.youtube.com/embed/ZPIgQf1u1tI" title="Eksklyuziv intervyu “Samarqand ruhi”ni yanada yuksaltirdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳтарама Комилова, Улуғбек Тўхтаев (видео), ЎзА