Украина ва Европа Иттифоқи учун ҳал қилувчи деб баҳоланган саммит кутилганидек ўтмади, аммо тарихий қарор билан якунланди. Euronews дипломатик манбаларга таянган ҳолда ЕИнинг Украинага 90 млрд евро ажратиш бўйича келишуви қандай қилиб ёпиқ эшиклар ортида шаклланганини очиб берди.

Саммит расман бошланишидан олдиноқ асосий музокаралар норасмий равишда кечган. Дастлаб Бельгияда сақланаётган музлатилган Россия активларига таянадиган товон пулини Киевга бериш режаси муҳокама қилинган. Бу ғояни Германия, Дания ва Еврокомиссия раҳбарияти қўллаб-қувватлади. Бироқ Бельгия ва Италия бу механизм мамлакат молия тизими ва евроҳудуд учун жиддий хатар туғдиришини таъкидлаб, қаршилик кўрсатди.  

Саммитда Украина президенти Владимир Зеленский Россия етказилган зарар учун жавоб бериши кераклигини таъкидлаб, товон пулини адолатли ечим сифатида баҳолади. Агарда молиявий ёрдам кечикса, Украинанинг ҳарбий имкониятлари баҳоргача заифлашишини очиқ айтди.  

Муҳокамалар кескинлашган пайтда Еврокенгаш раиси Антониу Кошта ташаббусни қўлга олди. У масаланинг муқобил ечими сифатида ЕИ бюджети кафолати остида қўшма қарз олиш орқали Украина учун 90 млрд евро ажратишни таклиф қилди. Бундай қарорни қабул қилиш барча аъзоларнинг якдил розилигини талаб қиларди. Шу орада Виктор Орбан бу режани айрим давлатлар иштирокисиз амалга ошириш таклифини берди. Оқибатда Венгрия вето қўймади ва келишувга йўл очилди.

Натижада Европа Иттифоқи Украинага 90 млрд евро миқдоридаги молиявий пакетни қўшма талабларсиз эришди.  

<iframe width="650" height="420" src="https://www.youtube.com/embed/tV3r7TsLHYw" title="YEI Ukrainaga 90 mlrd yevro moliyaviy yordamni ma’qulladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА