Олмалиқ шаҳри “Янги ҳаёт” маҳалласидаги комплекс ижтимоий хизмат кўрсатувчи ходим Мафтуна Ҳамзаева фаолиятини бошлаганига бир йил бўлди. Шу қисқа вақт ичида у 60 дан ортиқ оилага ёрдам қўлини чўзиб, эҳтиёжманд фуқароларга тегишли тартибда кўмак беришга улгурди.

Ҳозиргача унинг ҳоким ёрдамчиси билан ҳамкорликдаги саъй-ҳаракатлари орқали саккиз нафар ногиронлиги бор фуқаро иш билан таъминланди. Улар орасида мазкур маҳалланинг Ибн Сино кўчасида яшовчи Миразиз Умрзоқов ҳам бор. 

М.Умрзоқов илгари узоқ вақт давомида уйидан анча олисда бўлган заводда ишлаган, аммо, оиласига вақт ажратишга имкони бўлмаганди. Кўп вақти йўлда ўтган, шу сабабдан оилавий муносабатлар, фарзандлари билан вақт ўтказиш, уларни тарбиялашда қийналган. Аммо, маҳалласидаги комплекс ижтимоий хизмат кўрсатувчи ходимнинг кўмаги билан у фақат иш билан таъминланиб қолмай, балки ҳаётида ҳам сезиларли ўзгаришлар бўлди. 

Бугунги кунда у Олмалиқ кон-металлургия комбинатида ўз меҳнати билан оиласига таянч бўлиб келмоқда. Шунингдек, Миразиз адаптив спорт билан шуғулланиб, унинг фаоллигини ошди, янги имкониятларга йўл очди. Шунингдек, у уйида IТ йўналишида ҳам ишлаб пул топиши ва шу соҳа бўйича тўгарак очиш ниятида. 

А.Мусаев, ЎзА