Навоий вилояти Нурота тумани Сентоб маҳалласида “Дўстлик ва ҳамжиҳатлик улуғланган юрт” шиори остида маданий-маърифий тадбир ташкил этилди.
Дастлаб вилоят ҳокими Нормат Турсунов байрам иштирокчиларини самимий қутлади.
– Мамлакатимизда умуммиллий тотувлик, бирдамлик ва ҳамжиҳатликни мустаҳкамлаш, барча фуқароларга тенг ҳуқуқ ҳамда имкониятлар яратиш давлат сиёсатининг устувор йўналишларидан биридир, – деди вилоят ҳокими. – Бугун юртимизда ёшларни Ватанга муҳаббат ва садоқат, миллий ва умуминсоний қадриятларга ҳурмат билан қараш руҳида тарбиялаш, хорижий мамлакатлар билан маданий-маърифий алоқаларни кенгайтиришга йўналтирилган кенг миқёсли ишлар амалга оширилмоқда. Мамлакатимизда яшаб келаётган 130 дан зиёд миллат ва элатларнинг вакиллари Конституция ва қонунларимизда белгиланган ҳуқуқ ҳамда имкониятлардан фойдаланиб, иқтисодиётнинг турли тармоқлари, ижтимоий, илм-фан ва маданият соҳаларида самарали меҳнат қилмоқда. Ватанимизнинг гуллаб-яшнашига ва унинг мустақиллигини мустаҳкамлашга, республиканинг халқаро майдондаги обрў-эътибори ва имижини оширишга муносиб ҳисса қўшиб келмоқда.
Сентоб маҳалласи аҳли ушбу халқ сайлига ўзгача тайёргарлик кўрди. Халқ сайлида ўзбек ва тожик миллатларининг миллий урф-одат ва анъаналари, аҳиллик ва қардошлик ришталари, тинч, обод ҳамда тўкин ҳаёти тараннум этилди.
– Маҳалламизда 606 та оилада 2 минг 300 нафардан зиёд ўзбек ва тожик миллатига мансуб аҳоли истиқомат қилади, – дейди маҳалла раиси Мурод Мурзоев. – Ҳудудимизда 3 та мактабгача таълим муассасаси, 3 та мактаб бўлиб тожик тилида ҳам таълим олиб борилади. Аҳолимизнинг фаровон турмуш кечириши учун давлатимиз томонидан барча имкониятлар яратиб берилган.
Нурота тоғларининг шимолий ён бағрида жойлашган Сентоб қўшни Жиззах вилоятининг Фориш тумани билан чегарадош. Бу маскан ўзининг қадим тарихи, маданий-мероси, ўтмиши, миллий қадриятлари ва урф-одатларининг бугунги кунга қадар сақланиб қолганлиги билан бошқа қишлоқлардан ажралиб туради.
Бу ҳудудда туризм ривожланган бўлиб, Самарқандда бўлиб ўтган Бутунжаҳон туризм ташкилоти Бош Ассамблеясининг 25-сессияси доирасида “2023 йилнинг энг яхши туризм қишлоқлари”ни тақдирлаш маросимида “Энг яхши туризм қишлоғи”, деб эътироф этилган.
Дўстлик ва ҳамжиҳатлик байрами доирасида “Адабий кўприк” композицияси остида юртимиз ҳамда қўшни давлатларнинг буюк аждодлари адабий меросини акс эттирувчи китоблар кўргазмаси, шунингдек, миллий ҳунармандчилик намуналари, қадимий буюмлар ва миллий таомлар кўргазмалари, қизиқарли халқ ўйинлари ҳамда миллий спорт беллашувлари ташкил этилди.
[gallery-22602]
Тадбирда ўзбек, тожик, рус, қозоқ, татар, қирғиз, озарбайжон тилларида қўшиқлар куйланди.
Бу каби халқ сайллари Навбаҳор туманининг Қўҳрон ва Нурота туманининг Каттасой маҳаллаларида ҳам бўлиб ўтди.
А.Бўриев, С.Аслонов (сурат), ЎзА мухбирлари