Иқтисодиёт ва молия вазирлиги томонидан Хоразм вилоятида жойлашган юздан ортиқ бюджет буюртмачилари иштирокида давлат харидлари соҳасидаги мавжуд муаммолар ва уларни бартараф этиш масалаларига бағишланган онлайн давра суҳбати ташкил этилди.
Унда Иқтисодиёт ва молия вазирлиги Давлат харидлари департаменти директори Сарвар Назаров ва бошқалар соҳадаги сўнгги янгиликлар, амалга оширилаётган чора-тадбирлар ва келгусида режалаштирилган ишлар ҳақида маълумот берди. Шунингдек, давлат харидлари жараёнида шаффофликни таъминлаш ва коррупция хавфини камайтириш масалаларига ҳам эътибор қаратилди.
Таъкидланганидек, очиқ-ошкора ва самарали давлат харидлари тизимини шакллантириш орқали давлат маблағларининг мақсадли ва тежамкорлик билан сарфланишини таъминлаш муҳим вазифалардан бири ҳисобланади.
Мутахассислар давлат харидлари жараёнида замонавий рақамли технологиялардан фойдаланиш, электрон тендерлар ва мониторинг тизимини такомиллаштириш борасидаги таклифларни ҳам билдирди. Бу эса харидлар жараёнидаги бюрократик тўсиқларни камайтириш ва тадбиркорлик субъектлари учун тенг шароит яратишга хизмат қилади.
Тадбир якунида давлат харидлари жараёнида юзага келаётган муаммоларни самарали ҳал этиш мақсадида тегишли ҳуқуқий тушунтиришлар берилди ҳамда тизимли камчиликларни бартараф этиш учун аниқ чора-тадбирлар режаси ишлаб чиқиш белгиланди.
Н.Зиёдуллаева, ЎзА