Пахта зироат сифатида икки минг йил аввал ҳам экилганини ва толасидан матолар тўқилганини археологик топилмалар исботлаган. Орадан шунча асрлар ўтиб ҳам деҳқон янги нав, самарадор услуб, юқори ҳосил олиш чораларини излайди. Бу йил Фарғона вилоятининг барча туманларида Ўзбекистон Президенти тавсиясига кўра Хитой услубида чигит экилди. Мақсад ўша-ўша – юқори ҳосил олиш.

– 5450 гектарни ташкил этган 161 та контурга шу йил 20 мартда экиш ишларини бошлаб 19 апрелда тўлиқ тугатдик. Шундан 60 гектар майдонга тажриба тариқасида плёнка остига чигит экдик, – дейди Данғара туман фермерлар кенгаши мутахассиси Абдулазиз Баҳромов. –Ўтган йили қўшқатор экилган майдонлардан  40-47 центнердан ҳосил олди фермерлар. Бу йил эса янги тажриба асосида 55-70 центнергача ҳосил олишга харакат қиляпмиз.

Бу майдонлар Данғара туманининг “Азия Премиум” масъулияти чекланган жамиятига қарашли. Уларга қўшқатор қилиб плёнка остига томчилатиб суғориш усулида чигит экилган эди. Майдон талаблар даражасида тайёрлангани, чигит сифатли экилгани учун ҳам ёш ниҳоллар плёнка остидан бош кўтариб икки- уч қулоқ кўрсатиб қолди.  

– Бу йил пахтани фақат қўшқатор усулида  ва фақат плёнка остига экдик, – дейди “Азия Премиум” МЧЖ раҳбари Илҳомжон Умматқулов. – Мақсад – хосилдорликни янада ошириш. Яъни энг камида 55-65 центнердан ошириб пахта етиштириш. Бунинг учун плёнка қўлладик ва томчилатиб суғоришни жорий қилдик.  

Фермер Илҳомжон Умматқуловнинг айтишича, у ҳар бир кўчатни танийди. Тўғри, у бу гапни фарғонача аския аралаш айтган бўлсада, аслида қайси қаторда нечта уяда чигит унмаган, ёки кўчат қулоғи плёнкадан чиқарилмаган, буни аниқ билади.

– Ҳар гектар майдонда 240 мингтадан ортиқ кўчат униб чиққан. Уларни ягана қилиш шарт эмас. Хитойдан келтирилган экиш агрегатларини қўлладик. У чигитни маълум оралиққа санаб ташлаган. Натижада ҳар гектарига 20 кг уруғлик чигит сарфланди, холос, – дейди Илҳомжон Умматқулов.  

Шу кунларда Данғара туманидаги пахта майдонларида кўчат ниҳолларига ишлов бериш қизғин паллада. Бунинг учун тумандаги барча техник воситалар созлаб, жалб қилинган.

– Бугунгача 5450 гектар майдоннинг 3680 гектари ёки 67 фоизида чигит тўлиқ униб чиқди. Бу майдонларда чуқур юмшатгич ва култивация ишлари олиб борилмоқда, – дейди Абдулазиз Баҳромов.  

<iframe width="640" height="420" src="https://www.youtube.com/embed/0-AfcXFTU1g" title="Dangʼara: paxtachilikda Xitoy uslubi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Данғара тумани Фарғона вилоятида пахтачилик соҳасида ҳам ҳамиша пешқадам бўлган. Амалга оширилаётган ишлар бу йил ҳам юксак натижаларга эришилишидан дарак бермоқда.

Муҳаммаджон Обидов,Элёр Олимов(сурат, видео),

ЎзА