Ўзбекистон ёзувчилар уюшмаси ҳомийлигида янги китоб

Ўтган XX асрда миллионлаб юракларга кириб борган ва ўлмас сатрлари ила ҳамон шеърхонлар юрагидан жой эгаллаб келаётган ҳассос шоир, уста ғазалнавис Чустий домланинг “Сайланма”си Ўзбекистон Ёзувчилар уюшмаси ҳомийлигида нашрдан чиқди.

Зийрак ўлсин душманингу дўст нодон бўлмасин,

Нотавон ақлингга айт, бу сўзга ҳайрон бўлмасин, деб ёзади шоир...

Чустий домла қаламига мансуб жуда кўп шеъру ғазаллар бугунги кунда ҳам ўз аҳамиятини йўқотмаган. “Яхши ота-онадир”, “Ота ҳурмати”, “Ақли расо бўлсин”, “Фарзандлар учун”, “Дам ғанимат” сингари кўплаб ахлоқий-тарбиявий мавзудаги шеърлари, ўз даври тазйиқларига  жавоб ўлароқ янграгувчи “Аруз илми” мухаммаси, “Ким етдию, ким етмади”, “Ким кейин, ким илгари” сингари ўнлаб ғазал ва мухаммаслари шулар жумласидан. Бу асарларнинг ҳар сатри, ҳар байтида катта бир юракнинг, бедор-беором бир қалбнинг уйғоқ садоларию туғёнлари гупуриб эшитилиб туради. 

Шоирнинг “Индамаслар олами” маснавий достони алоҳида мавзу. Бу асар ўша қийин ва қабоҳат йилларда ҳам таниқли санъаткорлар томонидан қўшиқ қилиб айтилганда, минглаб мухлислар сел бўлиб эшитган. 

Шоир шеърлари замирида бир ҳақиқат ётади: одамзод фақат яхшилик учун яралган, яхшилик учун одам болаларига умр берилган. 

Қадр этиб, қадр топиб, элу юрт учун фидо бўлиб яшамоқнинг саодатию одамзоднинг ўкинч ва армонларини ўзида мужассам этган бу достоннинг вазифаси билан аҳамияти ҳеч қачон эскирмайди.

Чустий домла ижодидан сараланган гулдаста – “Сайланма”ни ўқинг...

                                                                                                            ЎзА