Эрта тонгдан Тошкент халқаро аэропортида спортчиларимиз тантанали кутиб олинди. Жорий йилнинг 16-27 июль кунлари Германиянинг Рйен-Рур шаҳрида бўлиб ўтган Бутунжаҳон ёзги Универсиадасида миллий терма жамоамиз юртимизга медаллар шодаси билан қайтди.

- Мен Ўзбекистон Давлат жисмоний тарбия ва спорт университети номидан универсиадада қатнашдим, - дейди бадиий гимнастика бўйича терма жамоамиз етакчиси Тахмина Икромова. - Мусобақада жами 4 та: 2 та олтин ва 2 та кумуш медални қўлга киритдим. Энди Бразилияда шу йилнинг август ойида  бўлиб ўтадиган бадиий гимнастика бўйича жаҳон чемпионатига тайёргарлик кўрмоқдаман.    

Ушбу йирик халқаро спорт анжуманида дунёнинг 113 та мамлакатидан 18 та спорт тури бўйича 5100 нафардан ортиқ талаба спортчилар 234 та медаллар жамланмаси учун кураш олиб боришди.

Ўзбекистон спорт делегацияси мазкур мусобақада 11 та спорт тури бўйича 18 та олий таълим муассасаларида таҳсил олувчи 53 нафар спортчилардан иборат таркиб билан иштирок этди.  

Спортчиларимиз мусобақада 4 та олтин, 4 та кумуш ва 7 та бронза, жами 15 та медаль билан 113 та давлат орасида 13-ўринни эгаллашди. Ушбу натижа эвазига талабаларимиз МДҲ ва Марказий Осиё минтақасида яна биринчи бўлишди. Қолаверса бу сафар Ўзбекистон делегацияси ёзги Универсиада тарихида ўзининг энг яхши натижасини қайд этди.  

Спортчиларни қутлаш учун келган Президентнинг спорт масалалари бўйича вакили, Олий таълим, фан ва инновациялар вазири ва бошқа масъул раҳбарлар  томонидан уларнинг шаънига илиқ фикрлар билдирилди ва келгуси мусобақаларда зафарли одимлари бардавом бўлишини тилашди.

Албатта спорт соҳасида бундай улкан ютуқларни қўлга киритишимизда катта меҳнат ётибди, қолаверса ёшлар қобилиятини юзага чиқаришда сўнгги йилларда йўлга қўйилган янги тизим спортнинг барча йўналишларида ўз самарасини бермоқда.  

<iframe width="650" height="420" src="https://www.youtube.com/embed/g-tvgRckPRo" title="Butunjahon yozgi universiadada jamoamiz rekordi yangilandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Аслидин Алижонов, Улуғбек Тўхтаев, ЎзА