15 март, шанба куни Халқаро исломофобияга қарши кураш куни нишонланди. Бу сана Бирлашган Миллатлар Ташкилоти томонидан Янги Зеландиянинг Крайстчерч шаҳрида 51 кишини ҳаётдан олиб кетган фожиа - икки масжидга уюштирилган ҳужумнинг эртасига белгиланган.

БМТ Бош котиби Антониу Гутерриш ушбу кун муносабати билан эълон қилган нутқида таъкидлаганидек, исломофобия экстремистик мафкура, ноқонуний диний гуруҳлар, аҳолининг заиф қатламига ҳужум каби кенг қамровли муаммоларнинг бир қисмидир.

– Жаҳон ҳамжамияти ақидапарастликни рад этиши ва йўқ қилиши керак, – дейди жаҳон ташкилоти раҳбари. – Ҳукуматлар ижтимоий ҳамжиҳатликни мустаҳкамлаши, диний эркинликни ҳимоя қилиши, онлайн платформалар эса нафрат сўзлари ва таъқибларга қарши курашиши керак. Барчамиз мутаассиблик, ксенофобия ва камситиш ҳолатларига қарши чиқишимиз зарур. Кўпгина ҳукуматлар нафрат жиноятига қарши қонун қабул қилиш, салбий тушунчаларни йўқ қилиш учун мусулмонлар ва ислом ҳақида оммавий ахборот кампаниялари ўтказиш орқали исломофобияга қарши кураш чораларини кўрмоқда.

Сўнгги чора-тадбирлар қаторида Бош Ассамблея томонидан тайёрланган, Бош котибдан Исломофобияга қарши кураш бўйича махсус элчи тайинлаш сўралган резолюция қабул қилингани ҳам бор.

Эслатиб ўтамиз, 2019 йил 15 март куни Янги Зеландиянинг Крайстчерч шаҳридаги Нур ва Линвуд масжидларига 10 дақиқа оралиғида қуролли ҳужум қилинган. Оқибатда 51 киши ҳалок бўлиб,  49 киши яраланган. Жиноятчи австралиялик Брентон Таррант эди.

Янги Зеландия Бош вазири ҳужумни террор ҳаракати сифатида баҳолаган.

М. Пирматова, ЎзА