“Arab News” хабар беришича, кеча Исроилнинг “El Al” авиакомпаниясининг Париждаги офиси тажовузга учраб, мамлакатга қарши граффити билан “безалган”. Франция ва Исроил ўртасидаги юзага келган кескинлик шароитида мазкур ҳодиса “жуда хавотирли” баҳоланмоқда.

Париж марказидаги бино эшигида қизил бўёқ изи қолдирилиб, “El Al – геноцидчи авиакомпания” деб ёзиб кетилган.

Авиакомпания маъмурияти воқеа содир бўлган вақт идорада ҳеч ким бўлмагани, ҳодиса туфайли ҳеч ким жабрланмаганини билдирди. Масала “жуда жиддий” кўриб чиқилаётгани, Франция ва Исроил расмийлари бу борада яқин ҳамкорликда ишлаётгани қўшимча қилинган. “El Al” “зўравонликнинг ҳар қандай, айниқса нафратга асосланган шаклини сўзсиз қоралаши”, корхона самолётлари Исроил байроғини “ғурур билан” кўтараётгани таъкидланган.

Фаранг расмийлари иншоот ирқчилик ёки этник жиҳатдан ғаразли ният билан “таҳқирланиши” бўйича тергов бошланганини эълон қилди. Исроил транспорт вазири Мири Регев ҳужумни қоралаб, ҳодисани Президент Эммануэль Макрон сиёсати билан боғлади.

– Бугун “El Al”, эртага “Air France”, – деб ёзган у ижтимоий тармоқда. – Бу Президент Макроннинг Ҳамасга фойда келтирадиган баёнот бериши оқибати. Мазкур воқеа Макрон ўтган ой Фаластин давлатини тан олишга ваъда бергандан сўнг юзага келган дипломатик кескинлик даврига тўғри келди.

Исроил Ташқи ишлар вазирлиги ҳужумни қоралаб, антисемитизм кўриниши, деб атади ва Франция ҳукуматини “El Al” ходимлари ва идора хавфсизлигини таъминлаш, айбдорларни жавобгарликка тортишга чақирди.

Май ойида Париждаги яҳудийлар билан боғлиқ бир неча ҳудуд, жумладан Холокост ёдгорлиги, уч ибодатхона ва яҳудий ресторани яшил бўёқ билан бўяб ташланганди.

Францияда ташкил қилинган Ғарбий Европадаги энг йирик яҳудий жамияти тахминан 500 000 киши ёки мамлакат аҳолисининг тахминан 1 фоизини бирлаштирган.

М.Пирматова, ЎзА