Божхона қўмитаси раиси ўринбосари Отабек Ибрагимов Бухоро вилоятида экспортга йўналтирилган бир қатор ишлаб чиқариш ва қайта ишлаш корхоналари, жумладан, Жондор ва Қоракўл туманларидаги етакчи тадбиркорлик субъектларининг фаолияти билан ўрганди.
Жондор туманидаги “Аржуманбону чорваси” фермер хўжалигида ўтказилган учрашувда паррандачилик маҳсулотларини, хусусан, товуқ панжаларини қайта ишлаш орқали Хитойга экспорт қилиш масаласи муҳокама қилинди.
Корхона вакиллари экспортни йўлга қўйиш жараёнида дуч келаётган муаммолари тингланди. Учрашув якунида тегишли ваколатли органлар билан ҳамкорликда муаммоларни ҳал этиш ва экспорт жараёнини соддалаштириш бўйича чора-тадбирлар белгиланди.
Қоракўл туманида жойлашган “Қоракўл кумуш калава” МЧЖда ўтказилган сайёр ўрганишда эса, корхонанинг ишлаб чиқариш жараёни ва экспорт салоҳияти кўздан кечирилди.
Учрашув давомида божхона ҳужжатларини расмийлаштиришда юзага келиши мумкин бўлган муаммолар, уларнинг олдини олиш йўллари ва замонавий ёндашувлар муҳокама қилинди.
Зариф Комилов, ЎзА мухбири.