Қорақалпоғистон Республикаси божхона бошқармасида бошланғич касаба уюшма қўмитаси томонидан 2024 йилда амалга оширилган ишлар, келгусидаги режалари ва бошланғич ташкилот раисини сайлаш юзасидан ҳисобот йиғилиши бўлиб ўтди.
Унда Ўзбекистон давлат муассасалари ва жамоат хизмати ходимлари касаба уюшмаси Қорақалпоғистон кенгаши вакиллари, божхона бошқармаси шахсий таркиби иштирок этди.
Кун тартибида дастлаб Қорақалпоғистон Республикаси божхона бошқармаси бошланғич касаба уюшма қўмитаси раиси В.Матёкубовнинг амалга оширилган ишлари юзасидан ҳисоботи тингланди.
Таъкидланганидек, уюшма аъзолари фарзандлари учун 2024 йил давомида болалар оромгоҳларига 5 та йўлланма, ходимлар ва уларнинг ота-оналарига соғломлаштириш масканларида дам олишлари учун 4 та йўлланма берилиб, ички туризм тадбирлари доирасида жами 4 нафар ходимнинг Тошкент шаҳрига саёҳати ташкиллаштирилди. Бундан ташқари, уюшма томонидан бошқармада ўтказилган байрам тадбирлари, хусусан, 26 январь – “Давлат божхона хизмати органлари ходимлари куни” муносабати билан 70 нафар ходимга, 8-март – “Халқаро хотин-қизлар куни” муносабати билан 40 нафар аёл ходимага қимматбаҳо эсдалик совғалари топширилди.
Йиғилиш кун тартибидаги навбатдаги масала юзасидан бошланғич касаба уюшмаси ташкилоти раиси ва унинг таркибини сайлаш масаласи кўриб чиқилди. Очиқ овоз бериш йўли орқали ўтказилган сайлов натижасига кўра, “Довут-ота” чегара божхона пости бошлиғи В.Матёкубов бошқарманинг бошланғич касаба уюшмаси қўмитаси раиси этиб сайланди.
Тадбир якунида 2025 йилда амалга ошириладиган ишлар режаси келишиб олинди.
Довуд Абибуллаев, ЎзА мухбири.