Ўзбекистон “Адолат” социал-демократик партияси ҳамда Коррупцияга қарши курашиш агентлиги ҳамкорлигида ўтказилаётган “Коррупцияга қарши курашиш ойлиги”нинг учинчи босқичи олий таълим муассасаларида кенг кўламда давом этмоқда.

Жумладан, пойтахтимиздаги Тошкент давлат юридик университетида коррупцияга қарши курашишга қаратилган тарғибот-тушунтириш тадбири ташкил этилди. Тадбирда партия раисининг биринчи ўринбосари Абдукамол Раҳмонов маъруза қилиб, коррупциянинг келиб чиқиш сабаблари, унинг давлат ва жамият ривожланишига кўрсатадиган жиддий зарарлари ҳақида тушунчалар берди. Бу иллатга қарши самарали кураш олиб боришда жамиятнинг ҳар бир аъзоси, айниқса, ёшлар фаол иштирок этиши муҳимлиги алоҳида таъкидланди.

Тадбир давомида университет профессор-ўқитувчилари ҳам мавзуга оид ўз фикрларини билдирар экан, айниқса, ҳуқуқшунослик йўналиши талабалари учун коррупцияга қарши билим ва кўникмаларнинг зарурлигига алоҳида урғу берди. Шунингдек, коррупцияга қарши курашишда давлат органлари, сиёсий партиялар, таълим муассасалари ва жамоатчиликнинг узвий ҳамкорлиги, кенг қамровли тарғибот-ташвиқот ишлари муҳим ўрин тутиши таъкидланди.

Муҳтарама Комилова, ЎзА