Бухорода янгидан барпо этилган “Бухоро” болалар соғломлаштириш оромгоҳининг тантанали очилиш маросими бўлиб ўтди. Ушбу манзил Ўзбекистон касаба уюшмалари Федерацияси ташаббуси билан 56 миллиард сўм маблағ эвазига бунёд этилди.

Тадбирда вилоят ҳокими Ботир Зарипов, Ўзбекистон касаба уюшмалари Федерацияси болаларни дам олишини ва соғломлаштиришини ташкил этиш департаменти директорининг биринчи ўринбосари Хуршид Умаров қатнашди. 

Умумий 4,2 гектар майдонда жойлашган оромгоҳ 250 нафар бола учун мўлжалланган. Унда замонавий икки қаватли ётоқхона, маъмурий бино, машғулот ва тиббиёт хоналари, кутубхона, маънавият хонаси, ошхона, волейбол ва минифутбол майдонлари, амфитеатр ва сув ҳавзаси мавжуд.

Ушбу муассасада болаларнинг жисмоний ҳолати, руҳий саломатлиги, ижодкорлик қобилияти ва ватанпарварлик туйғуларини мустаҳкамлашга қаратилган 12 кунлик намунавий дастур асосида фаолияти йўлга қўйилган.

Оромгоҳдаги барча хоналар энг замонавий мебель, маиший техника жиҳозлари, ошхона анжомлари билан таъминланган. Кенг кўламдаги ободонлаштириш ишлари билан бирга болаларнинг бўш вақтларини мазмунли ўтказишлари учун кўргазмали бурчаклар ташкил этилган. Ушбу масканда болажонларни дармондориларга бой таомнома асосида тўғри овқатлантириш тизими ҳам йўлга қўйилган.

<iframe width="650" height="420" src="https://www.youtube.com/embed/aJEo_Qe5ni8" title="Bolalarning quvonchi cheksiz" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Зариф Комилов, Тоҳиржон Истатов (сурат, видео), ЎзА мухбирлари.