“Reuters”, “Uk.investing”, “The wall street journal” каби дунёнинг қатор етакчи нашрлари Ўзбекистон Республикаси Президенти Шавкат Мирзиёев Нью-Йорк шаҳрида “Boeing Global” компанияси президенти Брендан Нельсон билан учрашув ўтказгани, томонлар “Boeing” самолётларини етказиб бериш бўйича янги шартнома имзолаганини кенг ёритмоқда.

Мақолаларда “Ўзбекистон ҳаво йўллари” 8 миллиард доллардан ортиқ маблағ эвазига 22 та "Dreamliner787" самолётини харид қилишига урғу берилган. Шунингдек, АҚШ Президенти Дональд Трамп ўз ижтимоий тармоғи орқали мазкур келишувга алоҳида эътибор қаратиб, шахсан муносабат билдирган:

– Шу ой бошида Ўзбекистон етакчиси билан суҳбатлашган эдим. Бугун мен Президент Мирзиёевни “Boeing” иштирокида муҳим битим имзолангани билан табриклайман! Ушбу келишув туфайли Қўшма Штатларда 35 000 дан зиёд иш ўрни яратилади. Президент Мирзиёев – бир сўзли инсон ва биз яна кўплаб масалалар бўйича бирга ишлашда давом этамиз! Бу масалага эътибор учун ташаккур.

АҚШ Савдо вазирлиги тегишли шартнома душанба куни Нью-Йоркда Бирлашган МиллатларТашкилоти Бош Ассамблеяси 80-сессияси доирасида имзоланиб, муҳрланганини эълон қилди. Савдо департаменти мазкур битимни “Марказий Осиё билан энг йирик тижорат самолётлари шартномаси” деб атади.  

Муҳаррама Пирматова, ЎзА