Бобур Валиев: Ўзбекистон дунё сиёсатига таъсир қилувчи мамлакат мақомига кўтарилди
Давлатимиз раҳбарининг Тинчлик кенгаши биринчи саммитида иштирок этиш учун Америка Қўшма Штатларига ташрифи Ўзбекистоннинг нафақат минтақавий, балки глобал миқёсда ҳам тинчлик ва барқарорликни таъминлашга қаратилган ташаббуслари эътироф этилаётганини англатади. Қолаверса, мазкур воқеа Ўзбекистон – АҚШ муносабатларида янги босқич бошланаётганидан ҳам дарак бермоқда.
ЎзАнинг навбатдаги суҳбатдоши – Жамоат хавфсизлиги университети профессори, иқтисодиёт фанлари доктори Бобур Валиев шу ҳақда мулоҳаза юритади.
– Тинчлик кенгаши илк саммитида таъсисчи сифатида иштирок этаётганимиз тарихий воқелик. Зеро, Ўзбекистон 20 дан зиёд мамлакат ичида дунё, умуман, геосиёсий манзарада биринчилардан бўлиб АҚШ ташаббуси билан амалга ошаётган янги тузилма шаклланиши жараёнида қатнашяпти.
Маълумки, ялпи ички маҳсулоти қарийб 30 триллион долларлик АҚШ дунё иқтисодиётининг тўртдан бир қисмига эгалик қилади. Шундай экан, мазкур давлат билан стратегик шериклик ривожи Тинчлик кенгаши мисолида республикамизнинг нафақат минтақа даражасида, балки глобал, халқаро майдондаги энг муҳим воқеалар ва жараёнларга таъсир қилиш имкониятини беради. Ўзбекистон ва АҚШ ўртасидаги савдо кўрсаткичи 1 миллиард долларга яқинлашгани ҳам Янги Ўзбекистон иқтисодий сиёсатида янги саҳифа очди.
Давлатимиз ташқи сиёсатида яхши қўшничилик муносабатлари устувор эканлиги маълум. Марказий Осиёнинг беш мамлакати C5+ доирасида АҚШ, Хитой, Россия, Европа Иттифоқи каби иқтисодий жиҳатдан қудратли мамлакат ва минтақалари билан фаол ҳамкорликни йўлга қўйган. Авваллари минтақавий тинчлик, Афғонистон каби тор жараёнлар билан чекланилган бўлса, эндиликда Ўзбекистон халқаро майдонда, хусусан Яқин Шарқ ва Ғазо секторида тинчлик ўрнатиш, юзага келган вайронагарчиликни бартараф этиш бўйича глобал даражада қабул қилинаётган қарорларда жуда фаол. Яъни, юртимизнинг халқаро даражадаги мақоми тобора ошиб, халқаро ҳамжамият томонидан эътироф этилмоқда.
Дунё манзарасига эътибор қаратсак, бир неча қайноқ нуқталарда ҳарбий тўқнашувлар авж олгани, айниқса Яқин Шарқдаги қуролли можаро газак олиб кетаётгани халқаро майдонда янгича бир тузилма яратиш эҳтиёжини кучайтирди.
Тинчлик кенгаши, деб аталган янги тузилманинг илк саммити айнан Яқин Шарқда келиб чиққан қуролли можаро оқибатини бартараф этиш, ҳудудда барқарор ҳаёт, вайрон бўлган инфратузилма ва уй-жой, умуман инсон яшаши учун зарур шарт-шароитни тиклаш масаласига қаратилади.
Кенгашга аъзо давлатлар сони 20 дан ошди. Ўзбекистон шу етакчи мамлакатлар қатори биринчи йиғилишда иштирок этади. Бошқача айтганда биз Яқин Шарқ масаласи бўйича глобал даражада қарор қабул қилиш орқали дунё сиёсатига таъсир қила оладиган мамлакат мақомига кўтарилдик, дейиш мумкин.
Албатта бундай натижага ўз-ўзидан эришилгани йўқ. 2017 йилдан бошлаб Ўзбекистон прагматик, кўп томонлама ташқи сиёсат доирасида ҳам сиёсий, ҳам иқтисодий ҳамкорликни тобора ривожлантиряпти. Зеро, кўп томонлама, мувозанатли манфаатни таъминлаган ҳолда, барча мамлакатлар билан дўстона алоқалар ўрнатишга интилиш дунё ҳамжамиятида тинчлик барқарорлик, фаровонликка элтувчи ягона йўл эканини ҳаётнинг ўзи кўрсатмоқда.
ЎзА мухбири Гўзал Сатторова ёзиб олди.
