Бир қўлида фарзанд бешиги, бир қўлида илм
Бу йилги Зулфия номидаги давлат мукофоти билан тақдирланганлар орасида Фарғона политехника институти магистранти Зарнигор Орипова ҳам бор.
У жажжи қизалоқнинг онаси. Оила аъзолари, турмуш ўртоғининг қўллаб-қувватлаши туфайли илм-фан соҳасининг муҳим йўналиши – кимё-технологиялари соҳасида кўплаб ютуқларни қўлга киритиб келмоқда.
–Мамлакатимизда хотин-қизларни илм-фан билан шуғулланишлари учун барча шароитлар яратиб берилмоқда, – дейди у. – Буни ўзим мисолимда яққол кўриш мумкин. Ишлаб чиқаришдаги янгиликларни, замонавий техника ва технологияларни чуқур ўзлаштиришга ҳаракат қиламан. Шу боис замонавий техника ва технологияларни мукаммал ўрганиш орқали юртимиз иқтисодиёти, хусусан, кимё саноатини ривожлантиришга муносиб ҳисса қўшиш ҳаракатидаман.
Оилада китобхонлик муҳити шакллангани учун ҳам Зарнигор шу даражага эришди. Илмий изланишлари натижасида кимё саноати соҳасида электрон дастурий ишланмаларини яратиб, Интеллектуал мулк агентлигининг муаллифлик гувоҳномаларини қўлга киритди. 2018-2021 йилларда республика ва халқаро илмий нашрларда кимё фанининг долзарб муаммолари ечимига оид 30 га яқин мақолалари чоп этилди. Ҳаммуаллифликда бир неча ўқув-услубий қўлланмаларини яратди. 2019 йили I-Халқаро илмий-амалий конференцияда фаол қатнашиб, сертификат билан тақдирланди. 2020 йилда профессор Р.Тиллаев хотирасига бағишланган онлайн олимпиада ва халқаро конференцияда фаол қатнашди.
Шу билан бирга “SCIF Congress” нинг халқаро онлайн симпозиумларида фаол иштирок этиб келмокда. У институт Ёшлар иттифоқи бошланғич ташкилотида “Таълим жараёни сифатини мониторинг қилиш йўналиши” етакчиси, талабалар кенгаши аъзоси. Шунингдек, Ўзбекистон экологик партиясининг фаол аъзоларидан бири ҳисобланади. Ахборот коммуникация технологияларидан унумли фойдаланиб, инглиз ҳамда корейс тилларида китоб мутолаа қилади. “Ziyonet” таълим тармоғидан илм-фанга оид янгиликлардан доимий тарзда фойдаланиб келади.
Бир қўлида фарзанд бешиги, бир қўлида илмни маҳкам тутиб, қувонарли ютуқларга эришаётган Зарнигор том маънода янги Ўзбекистоннинг баркамол авлод вакилларидан бири эканлиги шубҳасиздир.
М. Сулаймонов, ЎзА
