Бугун юртимизда маҳаллаларда аҳоли бандлигини таъминлаш, камбағалликни қисқартириш ва даромадли қилиш бўйича манзилли ишлар олиб борилмоқда.

Жумладан, Президентимизнинг 2025 йил 17 январдаги “2025 йилда аҳоли бандлигини таъминлаш ва камбағалликни қисқартириш чора-тадбирлари тўғрисида”ги қарорига асосан ҳудудларда аҳоли бандлигини таъминлаш, уларни тадбиркорликка жалб қилиш ва даромадларини ошириш бўйича янги ёндашувларни кенг жорий қилиш, маҳаллаларда эҳтиёжманд аҳоли қатлами билан манзилли ишлашни ташкил этиш ва ижтимоий хизматлар кўламини кенгайтириш, юқори даромадли иш ўринларини яратиш ҳамда камбағалликни қисқартиришга алоҳида эътибор қаратилмоқда. 

Мазкур қарор ижросини таъминлаш мақсадида Марказий банк ва тижорат банклари томонидан маҳалла банкирлари фаолияти йўлга қўйилиб, уларнинг асосий вазифалари белгилаб берилди. 

Бугунги кунда Навоий вилоятида 330 та маҳалла фуқаролар йиғинлари мавжуд бўлиб, уларга 97 та маҳалла банкири ҳамда 321 та ёрдамчи-агентлар бириктирилди. 

– Ушбу жараённи банклар кесимида олиб қарайдиган бўлсак, “Агробанк” АТБ Навоий вилояти бошқармаси томонидан 82 та маҳаллага 21 та маҳалла банкири ҳамда 80 та ёрдамчи-агентлар бириктирилган бўлса, “Ўзмиллийбанк” АЖ Навоий вилояти Бош бошқармаси томонидан эса 50 та маҳаллада 17 та маҳалла банкири ҳамда 50 та ёрдамчи-агентлар фаолияти йўлга қўйилди. Вилоятдаги бошқа тижорат банклари томонидан ҳам мазкур янги лойиҳа доирасида маҳаллаларда банк ходимлари самарали иш бошлади, – дейди Марказий банк Навоий вилояти бош бошқармаси бўлим бошлиғи Толиб Ўринов. – Эътиборли томони, вилоятимизда 2025 йилда дастур доирасида маҳалла банкирлари томонидан маҳаллаларда аҳоли бандлигини таъминлаш, камбағалликни қисқартириш ва даромадли қилиш бўйича 640,8 миллиард сўм кредит ажратилиши белгиланган. Қайд этиш керакки, маҳалла банкирлари ва ёрдамчи-агентлар маҳалланинг бизнес имкониятларини ўрганиб, одамлар билан бевосита суҳбатлар ўтказмоқда, уларнинг ғояларини лойиҳаларга айлантирмоқда. Хусусан, аҳоли билан кредит олиш, қайтариш, бизнесни йўлга қўйиш ва маҳсулотини сотиш каби масалаларда мулоқотлар ўтказилиб, уларнинг молиявий саводхонлигини оширишга кўмаклашилмоқда. Шу билан бирга, тайёр бўлган лойиҳаларни ишга тушириш ва бизнесни йўлга қўйиш жараёнларида аҳолининг энг ишончли ҳамда яқин ҳамкорига айланмоқда. Шунинг билан бирга, аҳолини меҳнат қилишга ўргатмоқда, маҳалладаги камбағал оилаларни қисқартиришга кўмаклашмоқда, бизнесга жалб этишга ёрдамлашяпти. 

АТ “Алоқабанк” Навоий ҳудудий комплекс хизмат кўрсатиш маркази томонидан Навоий шаҳрининг “Ишонч”, “Ватан”, “Кимёгар” ҳамда “Мустақиллик” маҳалла фуқаролар йиғинларига бириктирилган маҳалла банкири Ҳабибулло Барпиев фаолиятга киришган кундан буён маҳалланинг бизнес имкониятларини ўрганиб, одамлар билан бевосита суҳбатлар ўтказмоқда. Шунингдек, жараёнда уларнинг ғояларини лойиҳаларга айлантиришга кўмаклашилмоқда.

– Аҳолининг молиявий саводхонлигини оширишга яқиндан ёрдам бериш баробарида, тайёр бўлган лойиҳаларни ишга тушириш ва бизнесни йўлга қўйиш жараёнларини тезлатишга ҳаракат қилмоқдамиз, – дейди маҳалла банкири Ҳ.Барпиев. – Ўтган қисқа давр ичида ҳар бир маҳаллада 6-7 тадан микролойиҳалар амалга оширилишига эришдик. Жорий йил давомида ҳар бир маҳалла кесимида 40 тадан микролойиҳа ташкил этиш чораларини кўрмоқдамиз.

Энг муҳими бугун маҳалла банкирлари ва ёрдамчи-агентлар орқали банк хизматлари аҳолига янада яқинлашмоқда.

А.Бўриев, ЎзА мухбири