Швейцариянинг Лозанна шаҳрида халқаро спорт форуми ўтказилмоқда. Халқаро от спорт федерацияси (FEI) томонидан ташкил этилган ушбу форумда Ўзбекистон йилқичилик ва от спорти федерацияси раиси Баҳромжон Ғозиев, федерация халқаро бўлим бошлиғи Акбаржон Қурбонов иштирок этмоқда.

Форумда от спортини янада ривожлантиришга оид бир қатор масалалар муҳокама қилинмоқда. Шунингдек, 2028 йилда "Лос-Анжелес"да ўтказиладиган ёзги Олимпия ўйинларига ҳамда 2026 йилда Германияда ўтадиган Жаҳон чемпионатига жамоаларни тайёрлаш ва малакаларини ошириш масалалари, чавандозлар маҳоратини ошириш ва келажакдаги йирик халқаро мусобақалар учун жамоаларни шакллантириш борасида ишлар кўриб чиқилмоқда.

Ўзбекистоннинг йилқичилик ва от спорти мутасадди раҳбарларининг форумдан кўзлаган асосий мақсадлари мамлакатимиз чавандозларига бўлган эътиборни шунингдек, Ўзбекистонда от спорти соҳаси нуфузини янада оширишдир.

Халқаро форум 3 апрель кунига қадар давом этади.

Жавоҳир Тошхўжаев, ЎзА