Транспорт назорати инспекциясининг маълум қилишича, пойтахтимизда жамоат транспортини мониторинг ва назорат қилиш давлат муассасаси билан биргаликда автобусларда йўл ҳақини тўламасдан тушиб кетаётган йўловчиларни аниқлаш бўйича кучайтирилган рейдлар бошланди.
Хабарда қайд этилишича, аксарият йўловчилар тўловларни ўз вақтида амалга ошириб, тизим қулайлигини эътироф этаётган бир паллада, айримлар йўл ҳақини ҳеч қандай сабабсиз тўламасдан автобусдан тушиб кетаётгани тез-тез учраб турибди.
“Тошшаҳартрансхизмат”нинг маълум қилишича, чиптасиз юрганларни жаримага тортиш 14 март санасидан бошланган. Хусусан, 1 апрелга қадар жами 56 кишига шундай чора кўрилган. Ушбу фуқароларга, Маъмурий жавобгарлик тўғрисидаги кодекснинг 144-моддаси 5-бандига асосан йўловчининг шаҳар ичида ва шаҳар атрофига қатнайдиган автобусда чиптасиз юриши БҲМнинг ўндан бир қисми – 37 минг сўм миқдорида жарима солинади.
Тўлов бир марталик QR-чипталар ёрдамида амалга оширилганда, уни сафар давомида сақлаб қолиш ҳамда назоратчи ва инспекторларининг сўровига асосан уларга кўрсатиш лозим. Ходимлар бундай текширувларни ҳар куни ўтказади.
Аввалроқ расмийлар чиптасиз юрганларни жаримага тортиш амалиёти йўловчиларга шароит яратмагунча қўлланмаслигини маълум қилганди.
Маълумот ўрнида айтиш жоиз, 2025 йил 1 январдан бошлаб Тошкент шаҳридаги автобус салонларида нақд пулда тўлов қилиш мумкин эмас. Йўлкирани 10 дан ортиқ нақд пулсиз тўлов усуллари орқали тўлаш мумкин: АТТО транспорт ва виртуал карталари, исталган банкларнинг UzCard ва Humo контактсиз карталари, халқаро тўлов тизимлари карталари (Visa, MasterCard, UnionPay), шунингдек, Click, Uzum, Plum тўлов иловалари орқали.
Нақд пулга бир марталик QR-кодли чипталар сотиб олинади, улар Paynet, Oson ва Multipay компанияларининг инфокиосклари, шунингдек, Paynet офлайн пунктлари орқали сотилади. Бундай чипталарнинг нархи 3000 сўмни ташкил этади, нақд пулсиз тўлов учун эса 1700 сўм ундирилади.
Ш.Маматуропова, ЎзА