Фарғона азалдан миришкор пахтакорлар, уста бободеҳқонлар юрти. Бугунги кунда ҳам бу эзгу анъана давом этаётган бўлиб, инновацион технологиялар қишлоқ хўжалиги соҳасига кенг тадбиқ этиляпти. Хусусан, вилоятдаги 12 та пахтачилик тўқимачилик кластерлари ташкил этилиб, манфаатдорлик йилдан- йилга ошиб бормоқда.

Бағдод туманида жорий йилги пахта йиғим-терими мавсумига катта тайёргарлик кўрилди. 5 минг 200 гектар майдонда етиштирилган ҳосилни қисқа фурсатларда йиғиштириб олиш, кўзланган режани ортиғи билан бажариб, илғорлар сафида бўлиш – бағдодлик фермерларнинг айни кундаги бош мақсадига айланган.

Бугун вилоят ҳокими Хайрулло Бозoров бошчилигидаги вилоят сектор раҳбарлари йиғим-терим жараёнлари билан яқиндан танишиш мақсадида тумандаги “Собиржон Самарқандий” ва “Бардош элита файз” номли фермер хўжаликларининг пахта дала майдонларини кўздан кечирдилар.

- Ҳар қанча уқтирилмасин, амалий семинарлар ўтказилмасин, лекин барибир айрим фермерлар ғўзани чеканкалашга ҳафсала билан қарамаяпти, - деди вилоят ҳокими. – Ғўза агротехникасида чеканкалашнинг афзаллиги жуда юқори. Чеканкаланган майдонларда ҳосилдорликнинг 10 фоизга ошиши, кўчатларнинг эса соғлом ва баравж ривожланиши кўп йиллик тажрибаларда синалган. Фермерларимизда яна бир “касаллик” бор: пахта майдонларининг четлари – уватлар кўп ҳолларда мутлақо бўш қолдирилади. Авваллари асл деҳқоннинг чўнтаги чигитга тўла юрган. Қаерда бўш жой кўринса, ўша ерга эринмасдан чигит қадаган. Нега бу ишни биз ҳам қилмаслигимиз керак?! Ахир пахтачиликда манфаатдорлик йилдан-йилга ошиб боряпти. Яхши даромадни кўзлаган фермер бир қарич ерни ҳам увол қилмаслиги керак энди.

Вилоят раҳбари эгатма-эгат юриб, агротехник тадбирларни бажариш давомида йўл қўйилган камчиликларни бирма-бир кўрсатиб ўтди ва албатта, ютуқлар ҳам тилга олинди. Ўз даласида чўнг ҳосил етиштирган “Бардош элита файз” фермер хўжалиги раҳбари Отабек Фахриддиновга эсдалик совғаси топширилди.

Қишлоқ хўжалигининг барча тармоқларида илдам бораётган вилоят фермерлари пахтачиликда ҳам пешқадам бўлишларига тилак билдирилиб, дуолар қилинди.

 

М. Сулаймонов, ЎзА