Хитой узоқ масофага мўлжалланган, гипертовушли тезликда учувчи янги ракета моделини намойиш этди. The Independent ёзишича, Lingkong Tianxing аэрокосмик компанияси ишлаб чиққан YKJ-1000 ракетаси 1300 километр масофани босиб ўтиши мумкин. Унинг конструкциясида енгил ва мустаҳкам кўпикли бетон қопламадан фойдаланилгани диққатга сазовор.

Мутахассислар ушбу ракета глобал мудофаа бозорида жиддий ўзгаришларга сабаб бўлиши мумкинлигини таъкидлашмоқда. Сабаби — нархининг ниҳоятда арзонлиги. YKJ-1000нинг тахминий қиймати 700 минг юан, яъни 99 минг доллар атрофида бўлиб, бу АҚШ гипертовушли ракеталари нархидан қарийб 40 баробар паст. Таққослаш учун, АҚШнинг бундай тоифадаги ракеталари одатда 4 миллиондан 15 миллион долларгача туради. 

Ҳарбий шарҳловчи Вей Донгсу давлат телеканалига берган интервьюсида ракетанинг айнан нархи сабабли кўплаб кичик ва ривожланаётган давлатлар учун қизиқарли вариантга айланиши мумкинлигини айтган. Унинг сўзларига кўра, кўпгина мамлакатлар ҳали ўз гипертовушли технологиясига эга эмас. Шу боис, YKJ-1000нинг узоқ масофага учиш қобилияти, юқори вайронкор кучи, тезлик билан ёриб кириш имконияти ва арзон нархи уни халқаро бозорда талаб юқори маҳсулотга айлантириши кутилмоқда.  

<iframe width="560" height="315" src="https://www.youtube.com/embed/3k1mNRz1DJU?si=czJsZ3-ixIajex-b" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Улуғбек Тўхтаев, ЎзА