АҚШ Президенти Дональд Трамп Венесуэла қирғоғи яқинида ноқонуний савдо-сотиқ билан шуғулланаётган кемага ҳужум уюштирилганини эълон қилди. Ижтимоий тармоқдаги саҳифасида у гиёҳванд модда олиб ўтаётгани разведка маълумотига кўра аниқланган кемага ҳужум ҳақида ёзма ва визуал тафсилот билан бўлишган.

Ҳужум Америка раҳбарининг буйруғи билан амалга оширилгани таъкидланган. Яъни, Трамп мудофаа вазири Пит Хегсетга ҳалокатли кинетик зарба йўллашни буюрган.

Қайд этилишча, разведка ўша кема гиёҳванд модда контрабандаси билан шуғуллангани, ноқонуний “наркотеррорчилар” билан алоқадорлиги ва ушбу ташкилот томонидан белгиланган йўналиш бўйлаб саёҳат қилганини тасдиқлаган.

Воқеа халқаро сув ҳудудида содир бўлганини айтган АҚШ етакчиси кема саҳнидаги 6 киши ҳалок бўлганини ҳам билдирди.

Тарқатилган 33 сониялик видео лавҳада тез ҳаракатланаётган кемага ҳужум натижасида аланга кўтарилгани акс этган.

Маълумки, Трамп кўрсатмаси билан Кариб денгизи минтақаси, Венесуэла қирғоғига 1 та сув ости ва 7 та ҳарбий кемадан иборат денгиз гуруҳи жўнатилган. Хегсет эса Америка армияси Венесуэлада амалиёт ўтказиш, жумладан режим ўзгаришига ҳам тайёрлигини билдирди.

АҚШ “наркотик контрабанда” баҳонасида Венесуэла қирғоғи яқинидаги баъзи кемаларни нишонга олгани Венесуэла ҳукумати ва халқаро ҳамжамият танқидига сабаб бўлди. Таъкидланишича, бундай ҳужум “халқаро қонунларга зидд”.                                          

     Г.Сатторова, ЎзА