АҚШ Марказий қўмондонлиги Америка манфаатини ҳимоя қилиш мақсадида Ямандаги “Ансор Аллоҳ” ҳаракатига қарши кенг кўламли амалиёт бошланганини эълон қилди. Шанба оқшомида ушбу гуруҳга қарашли қатор объектларга зарба берилган.
Таъкидланишича, Хусийлар таянчи саналган Саъда вилоятига ҳужум ҳамон давом этяпти. Шунингдек, қисман Яманнинг халқаро миқёсда тан олинган ҳукумати назорати остидаги шимоли-шарқий Маъриб вилоятига ҳам ҳужум уюштирилган.
Аввалроқ, яманлик манба "РИА Новости"га берган маълумотда айтилишича,пойтахт Сана шимолидаги аҳоли зич жойлашган ҳудудларда икки турар-жой биноси портлаган, камида 13 киши ҳалок бўлган, тўққиз киши яраланган. Айрим хабарларда 30 дан зиёд қурбон берилгани айтилмоқда.
“Ансор Аллоҳ” Қизил денгиз соҳилининг салмоқли қисмини назорат қилади. Яқин Шарқда можаро кучайиши асносида хусийлар Исроил билан боғлиқ кемаларга ҳужум қила бошлаган эди. Натижада Сувайш канали орқали юк ташиш деярли тўхтаган. Бундан ташқари хусийлар Исроил ҳудудига ракета ва учувчисиз учар қурилмалардан ҳам зарба йўлламоқда. Бундай ҳаракатлар фаластинликларга ёрдам билан изоҳланмоқда.
Яман шимолида ҳукмронлик қилаётган шиалар (хусийлар) энди Американинг ҳарбий амалиётига жавобан, БАА ёки Жибутидаги АҚШ базаларини нишонга олиши мумкин, дейди маҳаллий таҳлилчи Муҳаммад Ал-Баша "Вашингтон Пост" газетасига интервьюсида.
Айни пайт АҚШ самолётларининг Яманга зарбаси давом этмоқда.
Шанба куни Трамп АҚШ армиясига Яман шимолини бошқараётган "Ансор Аллоҳ" (хусийлар) ҳаракатига қарши "қатъий ва кучли" чоралар кўришни буюргани эълон қилинган. Эрон эса хусийларни қўллаб-қувватлашни тўхтатиш, “Америка халқи ва президенти”ги таҳдид қилмасликка чақирилган.
С.Раҳимов, ЎзА