Мамлакатимизда фуқароларнинг эмин-эркин ибодат қилиши, мусулмонларнинг ўз зиммаларидаги диний арконларни бекаму кўст адо этиши учун зарур барча шароитлар яратилган. Бугун халқимиз Рамазон ҳайити намозини шукроналик билан адо этди.

– Андижон шаҳри марказидаги барча қулайликларга эга вилоят бош жоме масжидида ҳайит намозини ўқиб чиқдим, – дейди меҳнат фахрийси, Андижон шаҳридаги Тўққизариқ маҳалласида яшовчи Воситхон Аҳматхонов.  – Очиғи, бугун ибодатимиз учун масжидларда яратилган шароитларни кўриб, шукроналар келтираман. Чунки ҳар сафар ҳайит намозларини ўқиб чиққанимда беихтиёр хаёлимга ҳайит намозлари ўқилиши таъқиқланган собиқ шўро давридаги одамларнинг сарсон-саргардон бўлиши, таҳқирланиши келади.  

Бир пайтлар қийин кунларни бошимиздан ўтказганмиз. Қанча таъқиб, тақиқлар, минг бир ҳадиклар билан намоз ўқир эдик.  

[gallery-22568]

Яратганга беадад шукрлар бўлсинки, бугун ибодат қилишимиз, намоз ўқишимиз учун ҳеч қандай тўсиқ йўқ. Масжидларимизда таҳорат олиш, намоз ўқиш, ибодат қилиш учун зарур барча шароитлар яратилган. Минглаб юртдошларимиз қатори яқинда умра сафарини адо этдим. Бунга беадад шукрлар келтираман. Илоҳим, тинч-осойишта, инсонлар қадри улуғланаётган юртимизга асло кўз тегмасин.

Андижондаги бош жоме масжидида ҳайит намози олдидан вилоят бош имом-хатиби Мирзамақсуд Алимов юртдошларимизни Рамазон ҳайити билан муборакбод этди, мамлакатимизда байрамни кўтаринкилик билан ўтказиш, намозхонлар учун кенг имкониятлар яратилганлигини алоҳида таъкидлади.  

Дарҳақиқат, Президентимиз томонидан имзоланган “Муборак Рамазон ҳайитини нишонлаш тўғрисида”ги қарорда халқимизнинг қадимий, диний байрами – муборак Рамазон ҳайитининг мазмун-моҳиятида мужассам бўлган инсонпарварлик, эзгулик, шукроналик, меҳр-оқибат сингари анъана ва қадриятларни асраб-авайлаш ҳамда кенг тарғиб этиш, ушбу улуғ байрамни муносиб нишонлаш, юқори савияда ўтказиш учун Андижон вилоятида ҳам зарур барча ишлар амалга оширилди.  

Бугун андижонликлар вилоятдаги 179 та жоме масжиди ҳамда “Сайид Муҳйиддин маҳдум” ўрта махсус ислом билим юртида ҳайит намозини юқори кўтаринкилик билан адо этди.  

Ф. Убайдуллаев, З. Умрзоқов, (сурат), ЎзА мухбирлари