Президент Шавкат Мирзиёев бошчилигида Ўзбекистон делегациясининг Нью-Йорк шаҳрида бўлиб ўтаётган БМТнинг 80-юбилей сессиясидаги иштирокини Америка Қўшма Штатларида вақтинча ўқиётган ва ишлаётган ҳамюртларимиз катта қизиқиш билан кузатмоқда. Анжуман кунларида ЎзА океан ортидаги энг фаол ёшларимизнинг фикрларини ўқувчилар эътиборига ҳавола этиб боради.
Амира Муртазоева, физиотерапевт:
– Биз АҚШга оиламиз билан 2008 йилда келганмиз. Шу ерда ўрта мактабни, кейин тиббиёт коллежини тугатдим. Ҳозир физиотерапевт бўлиб ишлаяпман. Мутахассис сифатида асосан ёшлар, кўпроқ хотин-қизлар жисмоний жиҳатдан соғлом бўлишига ҳисса қўшиш мақсадида фаолият олиб борамиз. “Соғ танда соғлом ақл” деганларидек, инсон қачонки жисмонан тетик бўлса, тиниқ фикрлайди, руҳи енгил бўлади. Кўп йилдан буён ватандан узоқда яшасак-да, Ўзбекистонни доим қўмсаймиз. Туғилиб ўсган юртимизда кечаётган воқеа-ҳодисалар билан мунтазам қизиқамиз. Масалан, мени тенгдошларимнинг ҳаёти, юриш-туриши, турмуш тарзи жуда қизиқтиради.
Кейинги йилларда Ўзбекистон ёшлари учун жуда кўп қулайликлар, имкониятлар яратилаётганини эшитиб хурсанд бўламиз. Ҳозир мамлакатимизда юз бераётган ижобий ўзгаришлар ҳақида интернетдан, ижтимоий тармоқ орқали ва қариндошларимиздан эшитиб, хабардор бўлиб турамиз.
Ўзбекистон Президенти АҚШга ҳар гал келганида бу ердаги ватандошларимиз, айниқса ёшлар қандай яшаётгани, нима ишлар билан машғуллигига қизиқади. Бундан жуда хурсанд бўламиз. Шу боис мутахассислигим, касбим тақозоси билан олаётган билимим, орттираётган хорижий тажрибамни юртимиз тараққиёти йўлида сарфласам, дейман.
<iframe width="560" height="315" src="https://www.youtube.com/embed/ACOgZYaUUag?si=zPvLbZqTunK7yVvJ" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ғайрат Хонназаров, Улуғбек Тўхтаев, ЎзА