Андижон вилояти Избоскан туманидаги “Лидерлар мактаби” нодавлат таълим муассасасида “Соҳибқирон Амир Темур – йирик давлат арбоби, буюк саркарда, илм-фан ва маданият ҳомийси” мавзусида давра суҳбати бўлиб ўтди.

Соҳибқирон Амир Темур таваллудининг 689 йиллиги олдидан Халқаро Амир Темур жамоат фонди Андижон вилоят бўлими ташаббуси билан ўтказилган мазкур тадбирда фонднинг вилоят бўлими фаоллари, ижодкорлар, таълим муассасаси ўқувчи ва ўқитувчилари иштирок этди.  

Дастлаб иштирокчиларга Амир Темур ҳаёти ва фаолияти ҳақида видеоматериал намойиш этилди.

Тадбирда сўз олган фонд ҳудудий бўлими бошлиғи, Ўзбекистон Ёзувчилар уюшмаси аъзоси Ҳабиб Сиддиқ, Абдулҳамид Чўлпон жамоат фонди раиси, Ўзбекистон Ёзувчилар уюшмаси аъзоси Орифжон Мелиев, таълим муассасаси директори Шуҳратбек Шодмоналиев, шоира Сайёра Солиева ва бошқалар буюк Амир Темур бобомизнинг ибратли ҳаёт йўли, давлат арбоби, саркарда, илм-фан ва маданият ҳомийси сифатидаги фаолияти ҳамда улкан бунёдкорлик ишлари ҳақида гапирди. Айниқса, Амир Темур ўз даврида маданият, маърифат, илм-фан ривожига салмоқли ҳисса қўшганлиги алоҳида таъкидланди. 

Шунингдек, нотиқлар ёшларни пухта билим олиш, буюк боболаримизга муносиб бўлиш, юртимиздаги тинчлик-осойишталик ва барқарорликнинг қадрига етиш, ватан равнақига муносиб ҳисса қўшишга чақирди. 

Иқтидорли ўқувчилар томонидан “Темур тузуклари” асосида тайёрланган кўргазмали чиқишлар намойиш этилди.

Самимий мулоқот, савол-жавоблар билан ўтган тадбир ўқувчи ёшларнинг буюк бобомиз – Амир Темур ҳаёти ва фаолияти ҳақидаги билим ҳамда тушунчаларини янада бойитди.

Ф. Убайдуллаев,
З. Умрзоқов (сурат), ЎзА мухбирлари