“You Gov” тадқиқот компанияси ўтказган сўров натижасига кўра, аксарият америкаликлар АҚШ фонд бозори қулашида Дональд Трампни айбдор ҳисоблайди.

Респондентларнинг 67 фоизи жавобгарликни Президентнинг зиммасига юклаган, 19 фоиз иштирокчи назарида у айбдор эмас. 14 фоиз сўралганлар қарор чиқаришга иккиланган. 44 фоиз одам Америка фонд бозорининг ҳозирги ҳолатини аянчли, дея баҳолаган. 9 фоиз учун вазият аъло даражада. Тадқиқотда қатнашган 10 фоиз фуқаро эса “яхши” баҳосини белгилаган. Сўров иштирокчиларининг 19 фоизи бозорнинг жорий ҳолати адолатли эканини таъкидлаган.

Сўров 7 апрель куни 4610 нафар америкалик ўртасида ўтказилди.

Трампнинг “жавоб тарифлари” жорий этилиши ҳақидаги баёнотидан кейинги биринчи ҳафта охирида АҚШ фонд биржаси асосий индекс 5,5 фоиз пасайган ҳолда ёпилди. Ихтисослашган нашрлар икки кунлик тарифлар давомида бозор 6,6 триллион доллар зарар кўрганини таъкидлаб, бундай кескин ўзгариш тарихда кузатилмаганини ёзган.

2 апрель куни Америка етакчиси бошқа давлатлардан импорт қилинадиган маҳсулотлар учун алоҳида тарифлар жорий этиш тўғрисидаги фармонни имзолади ва ўша санани “озодлик куни” деб атади. Энг паст ставка 10, Европа Иттифоқи товарлари учун 20 фоиз бож белгиланди.

Трампнинг ўзи айни ташаббусдан давлат бюджетига 6-7 триллион доллар даромад келтиришни ваъда қилган.

С.Раҳимов, ЎзА