Саудия Арабистонида давом этаётган “Риёд-2025” Ислом бирдамлиги ўйинларининг оғир атлетика беллашувларида ҳамюртимиз Акбар Жўраев 3 та олтин медалга сазовор бўлди.

Акбар полвон 110 килограммгача вазн тоифасидаги беллашувларда иштирок этиб, даст кўтариш машқида 193 кг. тошни ўзига бўйсундирган бўлса, силтаб кўтаришда 227 кг. ва иккикураш якунига кўра 420 кг. натижа қайд этди.  

Бу орқали делегациямиз ҳисобидаги 3 та олтин медални келтирди. Дарвоқе, Туркияда ўтган V Ислом бирдамлиги ўйинларида ҳам Акбар Жўраев 3 та олтин медалга сазовор бўлган эди.

Айни дамда, ўйинларнинг бугунги дастуридан ўрин олган беллашувлар давом этмоқда. Ўзбекистон делегациясининг жамғарган медаллари сони ҳозирча 12 та олтин, 17 та кумуш ва 9 та бронзани ташкил этмоқда.  

Натижада спортчиларимиз медаль жамғаришда умумжамоа ҳисобида иккинчи ўринга кўтарилди.

Жавоҳир Тошхўжаев, ЎзА