Президентимизнинг Рамазон ҳайити муносабати билан “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги фармонига мувофиқ Сурхондарё вилоятидан ҳам бир гуруҳ маҳкум халқимизнинг бағрикенглик, кечиримлилик, инсонпарварлик каби юксак фазилатларини чуқур ҳис этди.

Содир этган қилмишидан жазони ўташ даврида пушаймон бўлиб, тузалиш йўлига ўтган 28 нафар шахс муқаддас Рамазон ҳайитини яқинлари даврасида ўтказди. 

Айни кунларда вилоят ички ишлар бошқармаси жамоат хавфсизлиги хизмати пробация бўлими ходимлари уларнинг муаммосини тинглаб, соҳавий хизматлар ва ҳамкор ташкилотлар билан оилавий шароитларини ўрганмоқда. Ижтимоий ҳаётга мослаштириш юзасидан ўртага ташлаётган масалаларини ечиш бўйича тегишли ишларни олиб бормоқда. Камчиликларини бартараф этиш чоралари кўрилаётир. Фуқаролик паспорти расмийлаштирилиб, бир марталик моддий ёрдам пуллари олиб берилди. Тажрибали шифокорларнинг тиббий кўригидан ўтказиб, касаллик аниқланганларининг соғлигини тиклашга кўмаклашмоқда. 

Вилоятда афв этилган шахсларни моддий-маънавий қўллаб-қувватлаб, жамиятда ўз ўрнини топишга кўмаклашиш ва бошқа ҳаётий масалаларида ёрдам бериш давом этмоқда.

Холмўмин Маматрайимов, 

ЎзА мухбири