Тошкентда “Аёллик фасли” Ҳиндистон кино фестивали ўтказилмоқда. Шу муносабат билан пойтахтимиздаги “Hyatt Regency” меҳмонхонасида мазкур фестивалнинг тантанали очилиш маросими бўлиб ўтди.
Халқаро хотин-қизлар кунига бағишлаб, Ҳиндистоннинг мамлакатимиздаги элчихонаси, ушбу мамлакатнинг Ахборот ва радиоэшиттириш вазирлиги ва Ўзбекистон Республикаси Маданият вазирлиги ҳузуридаги Кинематография агентлиги ҳамкорлигида ташкил этилган ушбу тадбирда ўзбек ва ҳинд кино санъати вакиллари, ихлосмандлар иштирок этди.
Тантанали маросимда Ҳиндистоннинг Ўзбекистондаги Фавқулодда ва мухтор элчиси Смита Пант хоним ва Кинематография агентлиги директори Шуҳрат Ризаев икки мамлакат ўртасидаги дўстона алоқалар мустаҳкамланиб бораётгани ва бу кино санъати ривожида муҳим аҳамият касб этишини қайд этди. Бу фестиваль ўзбек ва ҳинд киноижодкорлари учун ҳамкорликда қўшма фильмлар суратга олиш имкониятини яратади.
Таъкидланганидек, фестиваль 14-16 март кунлари Тошкентдаги Алишер Навоий номидаги кино саройида бўлиб ўтмоқда. Тадбир доирасида "Аёл зеҳни", "Садоқатли ёр", "Она" каби аёллар ҳаётига бағишланган машҳур фильмлар намойиш этилади. Ушбу фестиваль томошабинларга жамият қарашларини шакллантиришда аёлларнинг илҳомлантирувчи ролини кўрсатиб берадиган ажойиб фильм тажрибасини тақдим этади.
Ҳинд кино санъати вакиллари Абҳишек Баччан, Гаури Шинде, Сайами Кхер ва Р.Балкининг чиқишлари тадбир иштирокчиларига кўтаринки кайфият бағишлади. Уларнинг таъкидлашича, икки мамлакат ўртасидаги самимий дўстлик ҳамкорликда фильмлар яратишга кенг йўл очади. Улар ўз сўзларида бу имкониятдан унумли фойдаланиш истагини билдирди.
–Ҳиндистон элчихонасига ушбу тадбирни ташкил қилгани учун катта раҳмат айтаман. Мен бу ерга 40 йил олдин, Тошкент халқаро кинофестивалига отам, жаноб Амитабх Баччан ва онам билан бирга келганман. Ўшанда 9 ёшда эдим. Бугун бу фестивалга яна қайтиш мен учун катта хурсандчилик. Икки мамлакат ўртасидаги маданий алоқалар мустаҳкам. Умид қиламанки, бу ҳамкорлик янада кенгайиб боради. Бугунги кунда жаҳон киноси тобора кенг эътироф топаётгани ўзбек кино саноати учун ҳам халқаро саҳнага чиқиш имконини яратади. Биз бу йўналишда ҳамкорлик қилишга ва қўлимиздан келган ёрдамни беришга тайёрмиз. Шунингдек, Ўзбекистонда фильмлар суратга олиш ва ўзбек киноларини Ҳиндистон томошабинларига намойиш этиш орзуим. Аёлларга ҳурмат – мен учун жуда муҳим масала. Бу фильмлар аёллар байрами муносабати билан намойиш этилмоқда, аммо мен аёлларни фақат байрамларда эмас, ҳар куни эъзозлаш керак, деб ҳисоблайман. Улар ҳаётимизда беқиёс ўрин тутади. Уларни қадрлаш – барчамизнинг бурчимиз. Отам менга доим хабар ёзиб турибди ва бу ерда нима бўлаётганини дақиқама-дақиқа билиб туришни истаяпти. Сизларга энг эзгу тилакларимни йўллайман! Менга, оиламга ва юртимга кўрсатган меҳр-муҳаббатингиз ҳамда ҳурматингиз учун чексиз миннатдорлик билдираман, –деди Абҳишек Баччан.
Тадбирда 2012 йилда яратилган "Аёл зеҳни" - “English Vinglish” фильми режиссёри Гаури Шинде Тошкентда ўтказилаётган Ҳиндистон кино фестивалида иштирок этаётганидан хурсанд эканини таъкидлади.
–Кинофестивалнинг ташкил этилгани жуда қувонарли воқеа. Айниқса, у аёлларга бағишланган бўлса, янада яхши. Кўп жойларда бундай махсус фестиваллар ўтказилмайди. Шу сабабли, бу ташаббус катта аҳамиятга эга. Аёллар бош ролда бўлган фильмларнинг қадри ортмоқда ва мен бундан ғурурланаман. “English Vinglish” фильми – аёлнинг ўзини англаши, қадрини қайта кашф этиши ҳақида. Аёлнинг ўзини ҳурмат қилиши энг муҳим нарса. Шунинг учун бу фильм бутун дунёда акс-садо берди. Фильм орқали эса асосий мақсадим – аёлларнинг ролини фақат уй ёки ошхона билан чеклаб бўлмаслигини кўрсатиш эди. Юртингизда ўтказилаётган ушбу фестивалда бу фильм "Аёл зеҳни" номи билан ўзбек томошабинларига намойиш этилади, –деди Гаури Шинде.
<iframe width="650" height="420" src="https://www.youtube.com/embed/FoAH5N0l73I" title="Abxishek Bachchan:"Menga,oilamga va ko`rsatgan mehringiz uchun cheksiz minnatdorlikbildiraman"" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Насиба Зиёдуллаева, Анвар Аҳмедов (монтаж), ЎзА